Дэлхийг өөрчилсөн эрхмүүд – Нүүр хуудас

9 төрлийн энтрепренерүүдийн зан төлөвийн онцлог

admin — Mon, 27 Sep 2021 00:51:04 +0000

Бизнес эхлүүлэн эрхэлж, амжилтанд хүрэхэд маш олон төрлийн чадвар, чадавхи хэрэгтэй болдог. Бизнесийн хүмүүсийн зан чанарын төрлүүдийг хараад, танд аль аль зан чанар нь байдаг, амжилтанд хүрэхийн тулд юундаа анхаарах хэрэгтэй гэдгээ тунгаагаарай. Та Билл Гэйтс шиг Алсын хараатай мөрөөдөгч (visionary) үү, эсвэл the Body Shop-ыг үүсгэн байгуулагч Анита Роддик агсан шиг Сайжруулагч уу?

Таны бизнесийн зан төлөв гэдгээр таны хувь хүний зан төлвөөс бизнесийн хэрэгцээг хангаж чадах онцлогуудыг хэлж байгаа юм. Та өөрийн бизнесийн зан төлвөө тодорхойлж чадсанаар компанидаа хэрхэн хамгийн оновчтой хувь нэмрээ оруулахаа ойлгож, төлөвлөж чадна гэсэн үг. Ингэснээр мөн та бизнест тань таны сул талуудыг нөхөх хүмүүсийг тодорхойлж, олох боломжтой болно.

Бизнес эрхлэгчдийн зан төлөвийг 9 төрөлд ангилсан бөгөөд тус бүрийг ойлгох нь танд компаниа хөгжүүлэхэд нэмэр болох нь лавтай. Хамгийн түрүүнд өөрийнхөө давамгай зан төлөвийг тодорхойлоод, бизнест энэ нь хэрхэн нөлөөлж байгаад дүгнэлт тавиарай.

Бизнес эрхлэгчдийн 9 зан төлөв

САЙЖРУУЛАГЧ:

Хэрвээ та бизнест сайжруулагчийн байр сууринаас ханддаг бол таны гол зорилго компаниараа дамжуулан орчин тойрноо сайжруулахад байдаг гэсэн үг. Таны баримталдаг гол зарчим бол: хүндтэй зорилгын төлөө ёс зүйтэй, зөв бодлого баримталж ажилладаг компанид амжилт ирдэг. Сайжруулагч хүмүүс бизнесийг зарчимтай, ёс зүйтэй удирдан явуулах өндөр чадварыг эзэмшсэн байдаг.

Анхаарах зүйл: Бүх зүйлийг төгс хийхийг шаарддаг хэцүү зантай бөгөөд ажилтан, харилцагч нартаа энэ зангаасаа болоод хэт шүүмжтэй хандах магадлалтай.

Жишээ төлөөлөл: Анита Роддик, The Body Shop-ыг үүсгэн байгуулагч

ЗӨВЛӨХ

Эдгээр хүмүүс хэрэглэгч, үйлчлүүлэгчиддээ маш чанартай, дэлгэрэнгүй зөвлөгөө өгч, дэмжлэг үзүүлж чаддаг. Зөвлөхийн баримталдаг гол зарчим: үйлчлүүлэгч, хэрэглэгчийн зөв ба бид тэдэнд ямар ч үед хамгийн дээд зэргийн үйлчилгээ үзүүлэх ёстой. Зөвлөх зан төлөвтэй хүмүүсийн үүсгэн байгуулсан компаниуд нь хэрэлэгчдээ төвлөрсөн бизнес болдог.

Анхаарах зүйл: Зөвлөхүүд бизнесийнхээ болон хэрэглэгчдийнхээ хэрэгцээнд хэт анхаарснаасаа болоод өөрсдийнхөө хэрэгцээг орхигдуулан, гэнэт эрч хүчгүй, баттерей дуусах магадлалтай байдаг.

Жишээ төлөөлөл: Жон У. Нордсторм, Nordstorm-ын үүсгэн байгуулагч

СУПЕР ОД

Ийм бизнесүүдийн төвд нь эрч хүчтэй, бусдыг өөрсдөө татах увидастай супер од захирал нь байдаг. Ийм хүн бизнесээ өөрийн хувийн брэнд дээр суурилан байгуулдаг.

Анхаарах зүйл: Ийм хүмүүс шартай бөгөөд хэтэрхий өрсөлдөөнтэй, ажлаас өөр зүйл мэддэггүй болох магадлалтай.

Жишээ төлөөлөл: Дональд Трамп, Trump Hotels & Casino Resorts, АНУ-ын 45-р ерөнхийлөгч

УРАН БҮТЭЭЛЧ

Эдгээр хүмүүс бол дуу цөөтэй, зожигдуу боловч маш өндөр бүтээлч сэтгэлгээтэй хүмүүс байдаг. Вэб дизайн, зар сурталчгааны агентлаг зэрэг бүтээлч сэтгэлгээ шаарддаг бизнесүүдэд ихэвчлэн байдаг. Уран бүтээлчийн хувьд ийм хүмүүс бизнесээ өөрсдийн авъяас, бүтээлч сэтгэлгээндээ тулгуурлан хөгжүүлдэг.
Анхаарах зүйл: Харилцагчаас ирсэн санаа оноог, эерэг ч байсан хамаагүй, хэт эмзэгээр хүлээн авдаг. Өөртөө байнга шүүмжтэй хандаж, сөргөөр төсөөлөхөө болих хэрэгтэй.

Жишээ төлөөлөл: Скотт Адамс, Dilbert комиксыг үүсгэгч

АЛСЫН ХАРААТАЙ МӨРӨӨДӨГЧ (Visionary):

Энэ төрлийн хүмүүсийн бизнес нь үүсгэн байгуулагчийнхаа ирээдүйг харах хараа, бодол дээр тулгуурласан байдаг. Ийм хүмүүс ертөнцийг ойлгох маш их хүсэл, сониуч зантай бөгөөд болзошгүй эрсдэлүүдээс хамгаалах төлөвлөгөөг боловсруулдаг.

Анхаарах зүйл: Алсын хараатай мөрөөдөгчид заримдаа мөрөөдөлдөө хэт автаад бодит байдлыг орхигдуулах магадлалтай байдаг. Алсын харааг дагаад ямар нэг үйлдэл, төлөвлөгөөт арга хэмжээ байх ёстойг санаарай.

Жишээ төлөөлөл: Билл Гэйтс, Microsoft компанийн үүсгэн байгуулагч

ШИНЖЭЭЧ

Шинжээч төрлийн хүний бизнес нь асуудал, бэрхшээлийг системтэй, дэс дараалалтай шийдэхэд төвлөрдөг. Шинжлэх ухаан, инженерийн болон компьютерийн компаниудын гол тулгуур болдог ба Шинжээчээр ахлуулсан компаниуд асуудалд шийдэл олохдоо гаргууд байдаг.

Анхаарах зүйл: Шинжилгээнд баригдаад хөдөлгөөнгүй болох магадлалтай. Бусдад итгэх чадвараа хөгжүүлэх хэрэгтэй.

Жишээ төлөөлөл: Гордон Мүүр, Intel-ийг үүсгэн байгуулагч

ГАЛТ БӨМБӨГ

Галт бөмбөг төрлөөр удирдуулсан компани нь амьдрал, эрч хүч, өөдрөг үзлээр бялхаж байдаг. Ийм компани нь амьдралд эрч хүч өгдөг ба хэрэглэгчдэд энэ компани бол хөгжилтэй, “чадна, хийнэ” гэсэн хандлагатай гэсэн сэтгэгдэл төрүүлдэг.

Анхаарах зүйл: Заримдаа хэт их ажлыг багтаа авах, сэтгэлийн хөөрлөөр асуудалд хандах магадлалтай. Сэтгэлийн хөөрөл ба төлөвлөлт хоёрыг сайтар хослуулах хэрэгтэй.

Жишээ төлөөлөл: Малколм Форбс, Форбс сэтгүүл

БААТАР:

Энэ төрлийн хүмүүс бизнес болон орчин тойрноо ямар ч саад бэрхшээл, хэцүү үеэр удирдан гарах чадвартай. Ийм хүмүүс бизнес эрхлэхдээ гаргууд бөгөөд гайхалтай компаниудыг байгуулж чаддаг.

Анхаарах зүйл: Хэт их амлалт өгөх, өөрийнхөө зорилгод хүрэхийн тулд муйхар тактикууд хэрэглэх нь урт хугацаандаа амжилтанд хүргэхгүй. Амжилтанд хүрэхийн тулд өөрийн манлайлах чадвараа ашиглан бусдыг хөгжүүлж, туслахад анхаар.

Жишээ төлөөлөл: Жэк Уэлч, General Electric

АНАГААГЧ

Анагаагчид бизнестээ тэнцвэртэй эрх тэгш байдал, дэмжлэгээр дүүрэн орчин бүрдүүлэхэд анхаардаг. Ийм хүмүүс маш тайван, амгалан дотоод ертөнцтэй бөгөөд энэхүү дотоод хүчээрээ бэрхшээлийг даван туулж, тууштай байж чаддаг.

Анхаарах зүйл: Бизнестээ анхаарал тавьж, тордон, арчилах хандлагаасаа болоод та бизнесээсээ гадуурх бодит байдлыг үл хайхран, орчноосоо тасрах магадлалтай. Болзошгүй асуудал, бэрхшээлд урьдчилж төлөвлөх нь чухал.

Жишээ төлөөлөл: Бэн Көэн, Ben & Jerry’s Ice Cream-ийг хамтран үүсгэн байгуулагч

Эдгээр зан төлөвүүдийн аль аль нь өөрийн үнэт зүйлсдээ тууштай байвал бизнест амжилтанд хүрч чадна. Өөрийн зан төлвийн давуу, хүчтэй талуудыг тодорхойлж мэдэх нь таны бизнест маш чухал. Баг бүрдүүлэх үед зав төлвөө сайтар мэдэх нь хамгаас чухал. Ганцаараа бизнес эрхэлж байгаа бол таны зан төлвийг нөхөж, тэнцвэржүүлэх ямар хүнтэй хамтарч болох вэ гэдгийг та эндээс ойлгож бас болно.

ЭХ Сурвалж: club.mn

МАТЕМАТИКЧ ТЭРБУМТАН – КЕННЕТ ГРИФФИН |Winnergy.mn

admin — Mon, 24 May 2021 05:53:44 +0000

“Citadel Investment Group” дундын сангийн үндэслэгч ерөнхийлөгч тэргүүн Кеннет Гриффин (Kenneth Griffin) санхүүгийн ертөнцөд аль хэдийн домог болжээ.

Кеннет Гриффин, өнөөдөр дэлхийн хамгийн том, хамгийн амжилттай явж байгаа байгууллагын нэгийг өөрөө байгуулан компанийхаа ерөнхийлөгчийг хийж байна.

Тэрээр бүр 1986 онд Харвардын 1-р дамжааны 18 настай оюутан “Forbes” сэтгүүлээс “Home Shopping Network Inк” компаний хувьцаа хэтэрхий үнэтэй байгаа тухай өгүүллийг уншжээ. Гриффин үүнийг мэдэж аваад, хувьцааны үнэ бууна гэж үзэн, өөрийн хуримтлалаа тавилаа. Тэгээд ашиг олов. Мөнгөний амт мэдэрсэн залуу хүү, үүнээс хойш зөвхөн хөрөнгийн бирж дээр мөнгө олох хувь тавиланг сонгохоор шийдсэн байна. 17 жилийн дараа 2003 онд Гриффин нөгөө “Forbes” сэтгүүл дээрээ хамгийн баян америкчуудын зэрэглэлээр 650 сая долларын хөрөнгөтэй гарсан юм.

Тэр 34-хөн насандаа Америкийн хамгийн залуу хоёр дахь баян хүнээр тодорлоо. 2006 онд түүний хөрөнгө 1.7 тэрбум доллараар үнэлэгдэж, 2007 онд гурван тэрбум давжээ. Түүнээс гадна залуу тэрбумтаны зан чанарын хамгийн ажиглагдам чанарууд нь паранойд болох шахсан битүүлэг зан, орчин тойрныхноо зэвүүцүүлсэн зожиг шинж, тансаг хээнцэр зүйл руу тэмүүлсэн үлбэгэр тэмүүлэл, санхүүгийн шинэ агуу их нэгдсэн компани байгуулах ихсийн дон шүгэлсэн мэт мөрөөдөл байв.

Санаа бодол тээсэн компьютерчин

Кеннет Гриффин Флоридад төрж өссөн, багаасаа компьютер математик сонирхдог байж. Ирээдүйн тэрбумтны ээж, “Кен өсвөр наснаасаа л “Computer-Lands” дэлгүүр лүү дагуулж явахыг гуйдаг, очоод худалдагч нарын толгойг эргэтэл шалгаадаг байж билээ” гэж дурссан байдаг. Ахлах ангид байхдаа тэр “IBM”-ын шалгагчаар (тестерээр) ажиллаж байв. Бодвол алдаа эрж олох нь түүнд сэтгэл ханамж авчирдаг байсан биз. “Кен жирийн нэг залуу биш байсан юм. Тэр өөрөөсөө ах хүмүүстэй харилцахыг эрхэмлэдэг, амьдралд юунд хүрэх гэж байгаагаа мэддэг байсан. Бас түүний толгойд үргэлж ямар нэг санаа орж ирдэг” гэж тэр үеийн танил нь ярьжээ. Түүний хэрэгжүүлсэн санаануудын нэг нь “Discovery Educational Systems” (үнэхээр ингэж алдаатай нэрлэсэн) сургуулиудад компьютерын боловсролын программ зардаг компаниа нээсэн юм. 17 настай Гриффин үндэслэн байгуулсан энэ компани өнөөг хүртэл амжилттай ажиллаж байна.

Анхны сая

Ирээдүйн тэрбумтан маань хөрөнгө оруулалтаар Харвардад байхаасаа (Харвардыг гурван жилд төгссөн) хичээлийн завсарлагаанаар оролдож эхэлсэн. Эхлээд гарааны мөнгө болох 265 мянган доллараа ээж эмээ хоёр болон өөр хоёр хөрөнгө оруулагчаас гуйж аван энэ мөнгөөрөө хөрөнгө оруулалтын хоёр сан нээсэн юм. Сангийнхаа ажлыг тэр “Cabot House” оюутны байран дахь өрөөнөөсөө эрхэлж байв. Гриффин цонхон дээрээ хиймэл дагуулын тавган антенн байрлуулж арилжааны тухай шинэ сэргэг мэдээ авдаг. Сарын дараа зах зээлд 1987 оны хямрал тархахад short-д (богино хугацаанд) амжилттай гаршсан Гриффин анхны суурь мөнгөө оллоо. Тэр төгсөх ангид орохдоо голдуу зээлийн болзол өөрчилсөн үнэт цаасны арилжаа хийж анхны сая доллараа олов. Гриффин эдийн засгийн бакалаврын зэрэгтэй хамт бэлэг авсан юм. Түүний сангийн үйл ажиллагаа Чикагогийн алдарт хөрөнгө оруулагч “Glenwood Capital” сангийн эзэн Франк Мейерын анхаарлыг татжээ. Мейер Гриффинд нэг сая доллар өгөөд оюутан ахуйн цагийнхаа амжилтыг давтахыг хоёр дахин их хөрөнгөөр сануулав. Гриффин ч компьютерт оруулсан бирж дээр худалдаа хийх программын тусламжтайгаар богино хугацаанд амжилт гаргалаа.

“Citadel”-ын үндсийг тависан нь

Гриффины алдар нэр өсөх тусам хөрөнгө оруулагчид хэдэн арваараа, тэдний хөрөнгийг өсгөж өгнө гэж найдан хөрөнгө оруулж эхлэв. Эцэст нь 1990 оны арваннэгдүгээр сарын 01-нд хөрөнгө оруулалтын ертөнцөд алдаршуулсан 4.2 сая ам.долларын хөрөнгө бүхий “Citadel” сангаа байгуулсан байна. Компаний нэрээ ч тохиолдлоор бус сонгожээ. Тэр эдийн засгийн хямралын үед компаний хүчийг илтгэж байлаа. Эхний хоёр жилд өөрийн нэрээ бүрэн хадгалж чадав. 1991 онд жилийн 43%, 1992 онд 40.7%, 1993 онд 23.5%-ын ашиг олжээ. Гэвч 1994 онд зах зээлийн болзол өөрчилсөн үнэт цаасны арилжаанд хямрал нүүрэлж сан 4.3%-ийн алдагдал хүлээсэн. Хөрөнгө оруулагчид мөнгөө татан авч Гриффины ихэмсэг занд хүнд цохилт болов. “Kен тэр үед ийм явдал дахин давтагдах явдлыг хэзээ ч гаргахгүй гэж надад хэлсэн юм” гэж Мейер дурсдаг юм.

Макиавелли ба Коллинз нарын шүтэн бишрэгч

Цаг хугацаа өнгөрөх тусам “Citadel”-ыг үнэхээр эвдрэшгүй бат цайз болгох Гриффины эрмэлзэл өссөөр байв. Сангийн менежер байсан нэгэн “Энэ үед л менежментын эрсдэлийн сэдэв хөндөгдөхөд Гриффины жинхэнэ паранойк шинж ажиглагдсан юм” гэж ёжлон дурсдаг. Гриффин өрөөгөө түгжин Никколо Макиавеллийн “Prince” номоос иш татаж дээр нь сийлсэн ширээнийхээ ард менежментын тухай ном уншин санг эрхлэх ажилдаа алдаа гаргахгүйг хичээн өдөржин суух нь цөөнгүй байлаа. Тэрбумтан маань Жим Коллинзын бүтээлүүдийг эрхэмлэн уншдаг. Эрсдэлийг багасгахын тулд тэр “Citadel” компанид удирдлагын мэргэжлийн зөвлөхүүдийг байнга хөлслөн ажиллуулдаг байна. Энэ зорилгоор Гриффины боловсруулсан нэгдмэл бүтэцийг “сольж болохгүй юм гэж байхгүй” гэсэн зарчимд тулгуурлан хийжээ. Компанид ажил үүрэг гүйцэтгэдэг олон хүн ажилладаг учраас хэн нэг нь явахад бизнест нөлөөлдөггүй юм. Хэдэн жилийн өмнө сан өөрийнхөө нэрийн илэрхийлэл болсон 37 давхар барилгыг Чикаго хотод худалдаж авсан нь үнэхээр бат бэх цайз мэт харагддаг.

“Citadel” хэрхэн юугаар арилжаа хийдэг вэ?

Гриффин америкийн өөр нэг алдартай хөрөнгө оруулагч Жеймс Саймонсынх шиг математик аргыг “Citadel”–д баримталдаг. Энд түүний тооны логикт дуртай нь мэдрэгддэг байна. Үнэндээ тэр хэдэн жил бирж дээр арилжаа хийгээгүй бөгөөд хэний хувьд сайн бүтэж байна түүнд даатгадаг. Гэвч ихэнхдээ л компьютерт даатгадаг юм. Саймонстой адил сангийн ажилдаа математикч, физикч нарыг татах боловч компьютерын системд илүү итгэл үзүүлдэг байна. Түүнийхээр бол трейдерүүдэд өөрийн алдаатай стресстэй талууд байдаг. Компаний математикийн хэлтэс 36-р давхарт байрлах бөгөөд энэ байрны хана нь тусгай зориулалтын амархан угаагдах материалаар хийгдэж, хүнд хүнд томъёонуудыг шууд цагаан ханан дээр бичиж болохоор болгожээ. Ийм самбар Гриффины өрөөнд ч байх бөгөөд тэр хуучнаа сэргээж нийлмэл тэгштгэлүүдийг өөрөө зохиодог юм.

“Citadel”-ын хувьд бүх хөрөнгө оруулалтын сангийн дотроос хамгийн их хүчин чадалтай шинжилгээний хэлтэстэй бөгөөд Чикагогоос холгүй “нөөц” компьютерын систем ч бий. Ажлын ийм зохион байгуулалт нь томоохон банкуудын хувьд л байна уу гэхээс “эгэл жирийн” дундын сангуудад ахдах ажил. “Citadel”-ын биржид дамжин гардаг хоёр үндсэн сан нь “Kensington Global” ба “Wellington” юм. Өнөөдөр “Citadel” Нью-Йорк, Лондон, Токиогийн биржүүдийн арилжааны өдрийн орлогын 2-3%-ийг (70 сая шахам хувьцаа) эргэлдүүлж байна. Мөн засгийн газрын үнэт цаасны 10%, опционы 15% нь “Citadel”-ын мэдэлд байна. Опционы зах зээлд “Citadel” нь арилжааны явцад нөлөөж чадах цорын ганц сан юм.

Эрсдэл нөхөгддөг

Сан бол өөрийн арилжааг хэвшмэл хэрэгслэлээр явуулаад зогсохгүй худалдах ба худалдан авч болох бүх хэлбэрээр мөнгө олдог. “Kensington Global” нь “Citadel”-ын хамгийн том сан бөгөөд сүүлийн есөн жилд хөрөнгө оруулагчдад жилийн дунджаар 22%-ын ашиг өгдөг байна. Энэ нь бас зах зээлийн дунджаас дээгүүр комиссын хураамж төлсний дараах тоо юм. Хэрэв ихэнхи сангууд “2 ба 20” гэсэн дүрмийг баримталдаг бол 2% нь удирдлагын зардал, 20% нь олсон ашгаасаа сан өөртөө авах шимтгэл байдаг бол “Citadel” сан 2005 онд удирдлагын зардалд 8.75%-ыг төлж байв. Ингэхдээ “Citadel” бол нэг саяас дээш долларын хөрөнгө оруулах чадалтай хөрөнгө оруулагчдын сан бөгөөд эзэд нь харьцангуй эрсдэлтэй үйл ажиллагаа явуулахыг зөвшөөрсөн байдаг.

Тэрбумтангуудын шүүсийг шахах дамжлага

Сангийн ажилтнууд өөрийн өндөр татварыг төлөхдөө “Citadel бол ажлын төлөө олон зүйлээрээ дэнчин тавихыг удирдлагаас шаардсан хөлс шавхах бүтэц” гэж албан хаагч байсан нэгэн гомдоллож байжээ. Гэлээ ч гэсэн Гриффин од болсон ажилтнууддаа мөнгө өгөхөд хэзээд бэлэн байдаг ба жилдээ таван сая долларын хөлс авч байсан арилжаачид олон бий. Тэр ажилтнууддаа цаг үеийн явцад бага боловч дугтуйтай хувьцаа авдаг бусад сангууд шиг биш компаниа “үл хуваалцах” зарчмыг баримтлан зөвхөн бэлэн мөнгөөр төлбөр хийдэг. Хамтран ажиллах гэрээ дуусахын хирд ямар ч мөнгө амласан өндөр өртөгтэй арилжаачид компанид үлдэхийг хүсдэггүй нь гайхмаар зүйл биш. Сүүлийн таван жилд “Citadel”-с 15 топ менежер зугатжээ.

Компанийг орхигсод, мэдээжийн хэрэг Гриффин тэднийг зохих ёсоор үнэлдэггүй үнэлсэн ч түүнийгээ ил гаргадаггүйг мэддэг байв. Зарин нэгэнд нь Гриффины удирдлагын арга барил, компани дахь бүхнийг өөрөө хянаж байхыг эрхэмлэдэг, төлөөллийн бүрэн эрхийг тэвчиж чаддаггүй, хамтрагчиддаа итгэдэггүй зэрэг нь таалагддаггүй байна. Тэрбумтаныг мэдэх нэг нь үүнийг зан чанартай нь холбон үздэг. Тэр ажилтнууддаа байнгын байцаалт явуулна. Ийм шалгалт ярилцлагууд нь заримдаа хэдэн цагаар үргэлжилдэг юм. Мөн бизнесээ нэг өдөр ч болов орхин явж зүрхлэхгүй, аливаа хурал цуглаан семинарын урилгаас эрс татгалздаг. Өрсөлдөгчид нь Гриффиныг маш хатуу ширүүн гэдэг, жишээ нь “Third Point Partner`s” компаний захирал Ден Леб түүний тухай “элсний харх” гэж ярьсан нь бий. Лебийн Гриффинд явуулсан И-мэйл их алдартай. Түүнд “Citadel”-д тогтсон дэг журмыг “шорон” гэж нэрлэн түүнийг нилэнхүйд нь зусарч бялдуучид хүрээлсэн, хэн ч түүнтэй чин сэтгэлээсээ харьцдаггүй болохыг мэдрүүлэв. Ер нь Гриффин өөрөө илэн далангүй хүн биш, хамт ажиллагсдынх нь ярьснаар “Инровентын цаадах интровент” (олон нийтэд битүүлэг хаалттай хүн) Тэр өөрийн туслах Жоди Дейхмиллертэй хамт нэг өрөөнд суудаг ч гэсэн Жоди түүний төвлөрөлд саад болхгүйн тулд босстойгоо зөвхөн И-мэйлээр харьцахыг эрхэмлэдэг байна.

“Kен ер бусын авъяастай арилжаачин, гайхамшигтай сэтгэлгээтэй тархитай боловч түүнд сэтгэл хөдлөлийн боловсрол сох дутдаг” гэж түүнтэй ажиллаж үзсэн хүмүүс өөр хоорондоо шүүмжилдэг.

Мөсөн уул хайлж эхлэв

Гриффин сүүлийн жилүүдэд бага зэрэг “уярч” байгаа. Тэрбумтан-интроверт ч тэр түүний удирдсан “Citadel” ч тэр сүүдрээс гарч ирэв. “Хөшигөндөө завсар гаргасан нь “Citadel” удахгүй IPO гаргах гэж байгаа болхоор дуртай ч дургүй ч хөрөнгө оруулагчдад (ил тод байдал эзнийх нь санаанд нийцэхгүй байсан ч) өөрийгөө сурталчлах болно” гэж хорон хэлтнүүд шаагилдаж байна.

(Кеннет Гриффин Эхнэр Анна Диастай хамт)

Гэвч Гриффинд тохиолдсон дулаарал нь шал өөр шалтгаантай байж магадгүй юм. Тэр нь сайхан сэтгэлт гоо бүсгүй Анна Диастай холбоотой байх. Гриффин “Aragon Global Management” хөрөнгө оруулалтын санг үндэслэгч 37 настай зуун сая долларын хөрөнгөтэй Анна Диастай 2004 онд гэрлэсэн юм. Хурим дээрээ тэрбумтан маань аз жаргалын нулимс унагаж байжээ. Энэ нь түүний хувьд онцгой тохиромжгүй шинж байсан тул цугларагсад итгэж өгөхгүй байв. Хөрөнгө оруулагчийн гэр бүл, ойр дотныхон нь хүмүүс чухамхүү эхнэр нь Гриффиныг хүмүүсийн дунд үзэгдэж, биеэ хүнлэг авч явахыг албаддаг гэж ярьцгаадаг юм.

Ихэмсэглэх хүслэн

Хичээл зүтгэл нь хэдэн зуу дахин нөхөгдлөө. Гриффин өөрөө 20 тэрбум долларын эргэлтийн хөрөнгөтэй, дэлхийгээр нэг тархсан мянга гаруй ажилтан ажилладаг зургаан албан байртай “Citadel”-ыг дундын сан хэвээр байгахыг хүсэхгүй байгаагаа хэлдэг. Тэр “Citadel”-ын суурин дээр “Goldman Sachs” ч юмуу “Morgan Stanley” шиг хөрөнгө оруулалтын бүх чиглэлээр ажилладаг санхүүгийн хүчирхэг институт байгуулах хөөрүү мөрөөдөлдөө бүүвэйлэгдэн яваа. Гэтэл хаалттай дундын сан, корпораци байгуулахад бизнесын хувьд ч эзний хувьд ч илүү ил тод байж тунгалагшина гэсэн үг.

Сайхан амьдрахад садаа болох биш

Хөрөнгө оруулалтын олонх өрсөлдөгчдөөсөө Кеннет Гриффин ахуй амьдралдаа даруу бус байдлаараа ялгардаг. Анна Диастай 2004 онд хуримлахдаа хаа нэгтэй биш Францийн Версальд хуримаа хийж зочидоо цэнгүүлэхийн тулд алдарт “Cirque du Soleil” циркийг урьж, поп-дива Донна Саммерийг авчрсан байлаа. Тэр өндөр үнэтэй спорт загварын машинд дурлаж Чикагогийн “North Michigan Avenue”-д байрлах пентхаусыг 2000 онд 6.9 сая доллараар авсан бөгөөд хотын сор болсон хамгийн өндөр байшингуудын нэгэнд байрладаг. Гриффинд байдаг урлагийн бүтээлүүдийн цуглуулгыг үнэлэх боломжгүй, “Play Station” болон хөл бөмбөг тоглох дуртай нэгэн юм. Гэхдээ америк биш европ хөл бөмбөгөнд нугасгүй хүн. Харин сүүлийн долоон жилд тэрбумтны өвдөгөнд хийсэн таван удаагийн мэс ажилбар л түүнийг хөл бөмбөгийн талбайг бүрэн орхиход хүргэсэн билээ.

Орчуулсан: Жамбалдоржийн БАДАРЧ

Alibaba цахим худалдааны группийн үүсгэн байгуулагч Жек Ма | Tech-News.mn

admin — Fri, 14 May 2021 00:00:30 +0000

Ази тивийн хамгийн том цахим худалдааны сайтын эзэн Жек Ма 1964 онд Хятадын Жөжян мужийн Ханжоу хотод төржээ. Түүний жинхэнэ нэрийг Ма Юн гэдэг бөгөөд англи хэлний багш болж, жуулчдад хөтөч хийдэг болсон цагаасаа өөртөө Жек гэдэг нэр өгчээ.

Тэрээр энгийн гэр бүлд өссөн бөгөөд хичээлдээ тийм ч сайн байсангүй. Дунд сургуулийн багш нар нь түүнийг муу сурдаг учир хулигаан л болно хэмээн ад үздэг байв. Гэсэн ч хүүд том мөрөөдөл байсан юм. Сургуулиа төгсөн дунд дүнтэй төгсөлтийн хуудсаа өвөртлөөд Бээжингийн Их сургуульд элсэхээр шалгалт өгсөн ч 100 оноо авахаас ердөө ганц оноо авч байсан бөгөөд бууж өгөлгүй жил хүлээн дахин өгсөн ч мөн л тэнцээгүй байна. Ийнхүү эцэг эхийнхээ шахалтаар төрөлх хотдоо буцан мужийнхаа их сургуулийг Англи хэлний багшаар суралцан төгсчээ.

1988 онд Их сургуулиа төгссөн хойно нэгэн институтэд ажилд орсон ч амьдралаа бүрэн залгуулж чадахгүйн улмаас давхар орчуулгын ажил хийдэг болов. Улмаар рестораны менежер, гар дээрээс наймаа эрхлэгч, орчуулагч, интернет кафе ажиллуулагч зэрэг олон төрлийн ажил хийсний эцэст 1995 онд Хятадын анхны интернетэд суурилсан компани “Шар хуудас” нэрт цахим лавлах үүсгэн байгуулсан байна.

Энэ үеэс Жекд жижиг дунд бизнес эрхлэгчдэд зориулсан худалдааны интернетийн төвлөрсөн сайт нээх санаа төрж эхэлсэн байна. Хятад улсын аж үйлдвэр өдрөөс өдөрт хөгжиж, хятадын бараа дэлхийг бүрхэж байхад үйлдвэрлэгч, худалдан авагч хоёрыг холбох гүүр бий болгохоор зорьжээ. Гэсэн ч түүнд мөнгө болон цахим ертөнцийн тухай тодорхой ойлголт байгаагүй учир эхлээд өөрийгөө боловсруулах хэрэгтэй гэж бодон Хятадын гадаад худалдаа, эдийн засгийн хамтын ажиллагааны яамны дэргэдэх цахим худалдааны төвд мэдээллийн албаны ерөнхий менежерээр нэг жилийн турш ажилласан юм. Тэр үед буюу 1998 онд Yahoo-гийн үндэслэгчийн нэг Жерри Янгтай танилцсан нь Ма-гийн амьдралын чухал үе болсон юм. Одоо Yahoo нь Алибаба-гийн томхон хувьцаа эзэмшигчийн нэг болсон билээ.

Ийнхүү нэг жилийн дараа буюу 1999 онд Ма хамтран зүтгэгчдийн хамтаар өөрсдийн бүхий л хөрөнгийг шавхан Alibaba.com худалдааны сайтаа нээсэн юм. Компани байгуулах болсон тухайгаа хэлж, хуучин ажлынхаа залууст хамт ажиллахыг санал болгожээ. Ингэхдээ бүгд сарын 500 юанийн цалин авна. Амралтын өдөр гэж байхгүй. Та бүхэн өөрсдийн шийдвэрээ гурван хоногийн дотор гаргаарай гэжээ. Түүний ярьж дуусахад бүгд “хамт явцгаая” гэсэн гэдэг.

Бизнесийн эхэн үе маш хүнд байсан бөгөөд бүгд нэг өрөө байранд ямар ч амралт байхгүйгээр тасралтгүй ажиллаж, бүгд ижил хэмжээний буюу 500 юанийн цалин авч байсан учир зөрчил их гарсан гэдэг. Тэрээр БНХАУ, ер нь Азийн орнуудын найман цагаар ажиллах зарчмыг бүрэн эвдсэн бөгөөд ажилчид нь суудлаасаа босолгүй 18-20 цаг ажилладаг байв. Энэ нь Илон Маск, Марк, Жефф Безос зэрэг Цахиурын хөндийн акулуудын ажлын хэмнэл юм.

Шаргуу хөдөлмөрийн эцэст тэрээр гурван жилийн дотор компанидаа 60 сая ам.долларын санхүүжилт авч чадсан бөгөөд 2003 онд Хонг Конгийн зах зээлд IPO гаргаж чадсан байна.

2010 оноос Европын болон АНУ-ын хувцасны брэнд компаниуд Хятадын зах зээлд бараагаа худалдах, мөн хятадын хувцас үйлдвэрлэгчдийн барааг гадаад зах зээлд борлуулах зорилго бүхий aliexpress.com-ийг ажиллуулж эхлэв. Өнөөдрийн байдлаар Алибаба групп нь Хятадын онлайн худалдааны 80 хувийг гүйцэтгэж байгаа бөгөөд 500 сая хүн тэдний сайтуудаар үйлчлүүлж байна. Alibaba групп одоо цахимд суурилсан дэлхийн зургаа дахь том бизнес болсон ба үүсгэн байгуулагч Жек Маг-ын хувийн хөрөнгө 41.8 тэрбум ам.долларт хүрч дэлхийн хамгийн баян хүмүүсийн жагсаалтад 20 дугаарт, БНХАУ-ын хамгийн чинээлэг эрчүүдийн жагсаалтын гуравдугаарт бичигдсэн юм.

2012 Жек Магийн амжилтад хэрхэн хүрсэн тухай “Хөх мөрний матар” гэдэг баримтат кино дэлгэцнээ гарсан юм.

Жек өөрийн амжилтын нууцаасаа залууст харамгүй хуваалцдаг бөгөөд өөрийг нь одоо байгаа газар авчрахад хамгийн их тусалсан хэд хэдэн зүйлийг дурджээ.

Боломжийг олж хар, бүү дутуу үнэл

-Жекийн хувьд “Боломж” гэдэг зүйл зөвхөн ажилд ч биш амьдралд хамгийн чухал нөлөөтэй аж. Тэрээр мөрөөдлөө биелүүлж, зорьсондоо хүрч чадахгүй байхын хамгийн гол шалтгаан бол “Боломжийг олж хараагүй харалган байдлаас болдог” гэсэн байна.

Тууштай бай, хэзээ ч бүү бууж өг

-Амжилтад хүрэхийн тулд хүн бүрийн давах ёстой даваа бол бүтэлгүйтэл, үгүйсгэгчид. Тэр “Чи хэрвээ тэднийг давж, зорилгодоо үнэнч байж, бууж өгөхгүй байвал хариу нь заавал ирэх болно” хэмээн хэлж байсан. Түүнд ч бас шантрах, бууж өгмөөр энгийн ажлаа хийгээд амьдармаар үе байсан бөгөөд тэр болгондоо өөрийн дуртай кино “Forest Gump”-аа үздэг. Энэ киноноос тэрээр хэзээ ч шантарч болохгүй гэдэг хүчтэй мэссэжийг дахин дахин авах дуртай гэнэ.

Миний амьдралд маш олон таагүй зүйлс, бүтэлгүйтэл тохиолдож байсан. Хятадад анх KFC сүлжээ орж ирэхэд ажилд орохоор 24 хүн шалгуулж, 23-ыг нь ажилд авсан. Ажилд тэнцээгүй цор ганц хүн нь би байсан юм. Тэгэхээр зарим үед бүтэлгүйтэл чамайг улам хүчтэй болгоно.

Хөрөнгө оруулагчдад хэтэрхий их итгээд хэрэггүй

Шинээр бизнес эрхэлж буй хүн бүрд хөрөнгө оруулагч хамгийн чухал. Гэхдээ өөрийн чинь санааг, бизнесийн чинь үнэ цэнийг ойлгодоггүй хүнд найдвар тээн тайлбар хэлэх хэрэггүй. Зарим хүмүүст зургаан цаг тасралтгүй яриад ч ойлгодоггүй бол зарим хүмүүс зургаан минутын дотор л бүгдийг л ойлгодог. Тэгээд ч бидний бизнесийн гол нь хэрэглэгчид, тэд байгаа учир бид оршин тогтнож байгаа. Мөн ихэнх хөрөнгө оруулагчид таны санааг зөвхөн тоон өгөгдөл дээр үндэслэж үнэлэх болно. Тэхээр хүн бүрд зориулж би нэг зүйлийг хэлмээр байна. Үргэлж хөрөнгө оруулагчийн зөв байна гэж байхгүй. Тэднийг хүндэтгэлтэйгээр сонс. Гэхдээ эцсийн шийдвэр үргэлж чинийх байх ёстой.

Түүний хэлсэн эшлэлүүд

Хийж буй зүйлдээ итгэ. Хүмүүст таалагдаж байгаа эсэхийг үл тоон хийж буй ажилдаа л дурла.

Хэрвээ чи ийм байна тийм байна гэж тайлбар тавьсаар байвал хэзээ ч боломжийг олж харахгүй.

Хэзээ ч бүү бууж өг. Өнөөдөр хэцүү байж магадгүй. Маргааш бүр дордож ч мэднэ. Гэхдээ түүнээс цааших өдрүүд хамгийн гайхалтай байх болно.

Би үргэлж үйлчлүүлэгчдээ нэгдүгээрт тавьдаг учир нь тэд бидний оршин буйн шалтгаан.Хоёрдугаарт миний ажилчид, хамтран зүтгэгчид учир нь тэд бизнесийг минь хөгжүүлдэг. Харин хөрөнгө оруулагчид гуравдугаарт гэсэн дарааллаар ажилладаг.

Хэрвээ чи 35 хүртлээ ядуу хэвээрээ байгаа бол хүртэх ёстойгоо хүртэж

Гучин нас хүрэхээсээ өмнө мөрөөдөж, хүсэл шуналтай болох хэрэгтэй.

Жек Ма 2017 онд Монгол улсад аялахаар ирсэн ба энд байх хугацаандаа технологийн чиглэлээр суралцдаг оюутнуудад илтгэл тавьсан юм.

Эх Сурвалж: iToim.mn, Bloomberg, Forbes, Bio, Wikipedia

Дэлхийн анхны онлайн такси UBER-ийг үүсгэн байгуулагч Трэвис Каланикийн амжилтын нууц | Tech-News.mn

admin — Wed, 12 May 2021 08:18:02 +0000

Олон удаагийн бүтэлгүй оролдлогын дараа ч бууж өгөлгүй стартапаа эхлүүлж, одоо дэлхийн хамгийн баян хүмүүсийн тоонд ороод буй UBER-ийн үүсгэн байгуулагч Трэвис Каланикийн амьдрал, амжилтын нууцаас танилцуулъя.

UBER нь гар утасныхаа аппликейшнийг ашиглан ямар ч бэлэн мөнгө, жолоочтой харьцалгүйгээр такси үйлчилгээ авах боломж олгодог дэлхийн хамгийн алдартай онлайн тээврийн хэрэгсэл бөгөөд одоогоор дэлхийн 80 орны 600 гаруй хотод үйл ажиллагаагаа явуулж байна.

Трэвис Каланик гэж хэн бэ

Трэвис 1976 онд Калифорни мужийн Лос Анжелес хотод төрсөн, дунд сургуульд байхаасаа код бичиж, өөрийн гэсэн дот.ком байгуулах мөрөөдөлтэй болсон. Ахлах сургуулиа төгссөн хойноо Калифорнийн их сургуулийн IT инженерийн ангид суралцаж байсан ч 1998 онд найзтайгаа анхны вэбээ хөгжүүлэхээр сургуулиа орхижээ. Тэд Scour, Inc., нэртэй анхны онлайнаар кино хөгжим хуваалцах боломжтой дэлхийн анхны доткомуудын нэгийг бий болгосон ч Scour-д багтсан зураг, бичлэгт дүрснүүд зохиогчийн эрх зөрчсөн хэргээр өндөр торгууль төлж өөрийн бүх эд хөрөнгөө худалдаалснаар 2000 онд дампуурлаа зарлаж байв.

Хэдий хоосорсон ч Трэвис бууж өгөлгүй эцэг эхнийхээ граашт ажлаа хийсээр 2001 онд REDWOOSH нэртэй мөн адил файл хуваалцах боломжтой старпап вэбээ эхлүүлсэн. Тэр тухайгаа “Энэ удаа бүх зүйл хуулийн дагуу” явагдсан хэмээн дурссан байдаг. REDWOOSH-ийг амжилтад хүргэх гэж Тревис гэж зургаан жил зарцуулсан бөгөөд 2007 онд ACAMAI Technologies”-д 19 сая ам.доллар хүргэн зарж чадсанаар алдарт UBER-ийн бий болгох боломж бүрджээ. UBER компаниа Трэвис 2009 онд буюу 33 настайдаа байгуулсан бөгөөд энэ зууны хамгийн ахмад настай энтрепренерүүдийн нэг болсон юм. Компани байгуулах үйл явц тийм ч амар байгаагүй бөгөөд өмнөх стартап бүтэлгүйтлээс нь үүдэн түүнд цахиурын хөндийгөөс санхүүжилт өгөхөөс татгалзаж байв. Гэсэн ч Трэвис нас бол зүгээр л тоо, чи дал хүрсэн ч шинэ санаа гаргаж чадна гэж итгэсний үндсэн дээр хамтрагч Гаррет Кэмпийн тусламжтайгаар аппликейшнээ зохион бүтээж чаджээ.

2012 онд буюу ердөө гурван жилийн дараа Сан Франциско төвтэй UBER компани цар хүрээгээ тэлсээр дэлхийн 66 улс, 360 гаруй хотод үйл ажиллагаа явуулдаг болсон юм. Олон улсын зах зээлийн амжилтын хажуугаар тэрээр хэд хэдэн улсын Засгийн газар болоод, таксины жолоочдын эсэргүүцэлтэй тулгарсан бөгөөд 2014 онд Лондон, Парис, Мадрид зэрэг Европын гол хотуудын таксины жолооч нар Uber-ийг эсэргүүцэн жагсаал цуглаан зохион байгуулж ямар ч захиргаагүй хувь хүмүүсийг такси үйлчилгээ үзүүлэх боломж олгож буйг эсэргүүцэж байв. Түүнчлэн Тайвань, Нидерланд улсын дээд шүүхээр UBER компанийг шударга өрсөлдөөнийг үгүй болгож байна гэсэн үндэслэлээр хориглож байв. Сүүлийн жилүүдэд Тревис дан ганц нийтийн тээврийн хэрэглэгчид хоорондын бизнесээс хөндийрч жолоочгүй авто машин, нисдэг тэрэг гэх мэт үйлдвэрлэлд их хэмжээний хөрөнгө оруулж байгаа аж. Мөн 2016 оноос Элон Маскийн хамтаар АНУ-ын Ерөнхийлөгч Дональд Трампийн эдийн засгийн ойрын зөвлөхөөр ажиллаж байгаа билээ.

Тревисийн хувь хүний зан чанарыг эргэн тойрныхон нь тэвчишгүй, тууштай хэмээн тодорхойлсон бөгөөд хэзээ ч бууж өгдөггүй зан чанар нь түүнийг 4.8 тэрбум ам.долларын хөрөнгөтэй, дэлхийн 80 орны 600 гаруй хотод үйл ажиллагаагаа явуулж, 12 мянган ажлын байр бий болгох үндэс болжээ.

Amazon компанийн үүсгэн байгуулагч Жефф Безос | Tech-News.mn

admin — Tue, 11 May 2021 02:10:54 +0000

Форбес сэтгүүлээс гаргасан дэлхийн хамгийн баян эрхмүүдийн жагсаалтад Билл Гейтсийн дараа хоёрт жагсаж буй Жефф Безос нь дэлхийн хамгийн том цахим худалдааны Амазон компани, Вашингтон Пост сониныг эзэмшдэг аж.

Түүний эзэмшдэг Амазон компанийн хувьцаа 2017 онд огцом өсч, Жеффийн хөрөнгө 14.5 тэрбумаар нэмэгдсэн. Амазон компани энэ эрчээрээ ажиллавал Жефф Безос Билл Гейтсийг гүйцэх нь цаг хугацааны л асуудал хэмээн Форбес сэтгүүлд бичжээ.

Жефф Безос гэж хэн бэ

Тэрээр 1964 оны 1-р сарын 12-ны өдөр Мексикийн Албувартк хотын энгийн гэр бүлд төрсөн. Түүнийг төрөхөд ээж нь дөнгөж 17 долоон настай байсан бөгөөд төрсөн эцэгтэй нь ердөө сар гаруй хугацаанд хамт амьдраад салсан байна. Жеффийг дөрвөн настай байхад нь ээж нь Куб улсаас ирсэн цагаач иргэн Мигуэл Безостой гэрлэсэн ба хүүгээ түүний нэрээр овоглосон юм. Түүний төрсөн эцэг нь хүүгээ амьд гэдгийг саяхан буюу 2012 онд олж мэдсэн байна.

Жефф сургуульд орсон цагаасаа технологийн ухаанд сонирхолтой байсан ба физик, математикийн хичээлүүдэд гоц сайн хүүхэд байжээ. Дунд сургуульд байхдаа гэрийнхээ гараашыг өөрийн лаборатори болгон олон янзын туршилт хийдэг хүүхэд байв. Шинэ зүйл турших сонирхолдоо тулгуурлан, Принстон их сургуульд цахилгааны инженер мэргэжлээр суралцан төгссөн байна. Сургуулиа төгссөнийхөө дараа Волл Стрийтийн хэд хэдэн хөрөнгийн ажилласан бөгөөд тэндээ эхнэр Маккензитэйгээ танилцжээ.

Жефф хөрөнгийн зах зээлд хялбар хөлөө олж 26 настайдаа Д.Е.Шоу фирмийн дэд захирал болтлоо дэвшсэн байна. Гэсэн ч түүний сэтгэл мөнгө, зах зээлийн амжилтад ханаагүй бөгөөд 1994 оноос бага насны мөрөөдлөө биелүүлэн, мэргэжлээрээ ажиллахаар ажлаасаа гарсан байна.

Жеффийн анхны санаа ямартай ч онлайн худалдан авалт хийдэг платформ үүсгэх байсан ба 20 гаруй нэр төрлийн бүтээгдэхүүнээс номын худалдааг хамгийн “цэвэр” хэмээн сонгожээ. Амазоныг бүтээх явц хоёр жил өрнөсөн ба 1997 онд албан ёсоор олон нийтэд танилцуулсан юм.

Ийнхүү алдарт дэлхийн хамгийн том номын худалдаа Сиэтл хотод үүссэн түүхтэй.

Эхний жилүүд хүндрэлтэй байсан бөгөөд түүний өмнө ажилладаг байсан фирмийн захирал нь буцаж ирэхийг санал болгон, тохуурхаж байв.

Гэсэн ч шантралгүй үйл ажиллагаагаа явуулсаар 1998 оноос зөвхөн ном биш CD, DVD худалдаалж, төд удалгүй хувцас, тоглоом борлуулж эхэлжээ. 1990-иэд онд борооны дараахь мөөг шиг гарч ирсэн компаниуд бүгд дампуурч байх үед Амазон л ганцаараа тэсэж үлдсэн бөгөөд 2000 он гэхэд компанийн зах зээл дээрх үнэлгээ 510 мянган ам.долларт хүрч байв. Түүнд маш олон өрсөлдөгч байсан ба үйлчлүүлэгчид ч цахим худалдаанд дасахгүй, бизнес шинжээчид ч түүний ажлыг хүмүүсийг залхуу болгож байна, ажлын байрыг үгүй хийж байна хэмээн буруутгаж байсан юм. 2011 он гэхэд компанийн нийт үнэлэмж 17 тэрбумд хүрсэн бөгөөд, дэлхийн хамгийн их бараатай “юуг ч зарж болдог” хэрэглэгчдэд төвлөрсөн цахим худалдааны зах болсон байв.

Түүнчлэн, Жефф зөвхөн худалдааны ч биш, хөрөнгө оруулалт ,технологийн салбарт ч амжилттай яваа бөгөөд Амазоны нэрийн хуудас болсон номын худалдааг электронжуулж, түүндээ зориулан Киндлэ Инкийг байгуулсан. Мөн тэрээр сансар огторгуйд дурлагч бөгөөд түүндээ зориулж Blue Origin нэрт сансар судлалын хүрээлэн байгуулсан.

Мөн 2013 онд Жефф Вашингтон Пост сониныг 250 сая ам.доллараар худалдаж авч байв. Энэ тухайгаа тэрээр Вашингтон Постын үнэнч уншигч болохоороо хэмээн хэлсэн бөгөөд удирдлагууд болон хүний нөөцөд нь ямар нэг өөрчлөлт оруулаагүй, энэ хэвээрээ ажиллах нь хамгийн гайхалтай гэж хэлжээ.

2012 оноос эхлэн Амазон технологийн чиглэлд хурдацтай хөгжиж байгаа бөгөөд дээр дурдсан Киндлэ инкээс гадна, зөөврийн компьютер, дрон, гар утас үйлдвэрлэж эхэлсэн. Мөн Амазон компани дэлхийн хамгийн анхны хиймэл оюун ухаан ашиглан ямар ч кассын машингүй, супермаркетыг нээгээд байгаа юм.

Түүний амжилтын нууцаас

2017 онд Санммит сэтгүүлд өгсөн ярилцлагадаа Жефф өөрийн амжилтын нууцыг хэд хэдэн зүйлстэй холбон тайлбарласныг хүргэе.

1. Хамтрагчаа зөв сонгох: Чи юуг ч ганцаараа хийж чадахгүй, харин эсрэгээрээ үр бүтээлгүй хамтрагчтай байвал ямар ч сайхан санаа биеллээ олохгүй.

2. Нэг зүйлд л анхаарлаа төвлөрүүл: Жишээ нь, би гэр бүлтэйгээ хооллож байхдаа зөвхөн хоолоо идэж, тэдэнтэйгээ цагийг өнгөрөхийг илүүд үздэг, утас оролдож, телевиз үзэх биш. Би нэг зэрэг олон ажил хийдэггүй. Хүн угаас нэгээс илүү ажил хийх үед ажлын бүтээмж 50 хувь буурдаг шүү дээ. Гол ажилдаа л анхаарлаа төвлөрүүлэх хэрэгтэй.

3. Юу хийж чадахаа олж мэд: Би наймаанд одтой, би хоол сайн хийдэг зэрэг өөрийн чадах юмаа ол. Чадах юм байхгүй байвал суралц, хамгийн дөхөм байгаа дээрээ ажиллаж эхэл. Өөрөө дургүй, чадахгүй зүйлд мянга үсрээд ч хүрч чадахгүй, цаг, энергийн гарз.

4. Суралц бас дахин суралцах: Амжилтад хүрсэн хүмүүс бүгд гоц ухаантай эсвэл нэг оролдлогоор тийм болоогүйг байнга сана. Амжилт, мөнгөний цаана маш урт хугацааны хөдөлмөр байдаг юм. Тиймээс бусдыг хэрхэн хөгжиж байна вэ, хэмээн атаархаж толгойгоо гашилгахаар өөрийгөө хөгжүүлэх тал дээр анхаарч ажиллах хэрэгтэй.

5. Урт тоглоом болох тул бэлтгэлтэй бай: Нэг л удаагийн оролдлогоор тэрбумтан, төгс старт-ап хөгжүүлэгч болчихгүй. Анх бизнесээ эхэлж байхад минь ч тэр хүмүүс гэнэтхэн л дэлгүүр хэсэн гадуур явахаа байж гэрээсээ хэрэгтэй зүйлээ захиалдаг болоход итгэхэд урт хугацаа шаардсан шиг ямарваа ажилд цаг хугацаа шаардах л болно.

6. Өдөр бүр яг хамгийн эхний өдөр шиг эрч хүчтэй ажилла: 360 мянган хүнийг ажлын байраар хангадаг Жефф өдөр бүрийг анхны өдөр шигээр төсөөлж, анхаарлаа сулруулахгүй, хичээнгүйлэн ажиллаж өнгөрөөдөг гэнэ.

Тэр хэрхэн ажилладаг вэ

Жефф урт хугацаанд ажилладаггүй. Богино хугацаанд их бүтээмжтэй ажиллахыг илүүд үздэг. Ажилдаа өдөрт ердөө зургаан цагийг зарцуулдаг аж.

Тэр хэзээ ч сэрүүлэг тавьдаггүй “нүд өөрийн мэдэлгүй нээгдсэн үед л босдог” хэмээн хэлжээ.

1994 оноос хойш өглөө бүр эхнэр Маккензи болон дөрвөн хүүхэдтэйгээ цайлдаг болсон бөгөөд, хэзээ ч өглөө эрт уулзалт, ажил төлөвлөдөггүй юм байна. Оройн хоолоо ч мөн зөвхөн эхнэртэйгээ идэхийг илүүд үздэг.

Ажлын уулзалтын үер тэр “хоёр пицца” аргийг хэрэглэдэг. Энэ нь уулзалтад оролцох хүмүүст хоёр пицца хангалттай хүрэх ёстой гэсэн дүрэм бөгөөд үүнээс олон хүнтэй нэг дор уулзахыг төвөгшөөдөг. Олон толгой байх тусам санал зөрөлддөг хэмээн хэлж байжээ.

Түүний хэлсэн эшлэлүүдээс

Дэлхий дээр хоёр төрлийн бизнесмэнүүд байдаг нэг нь их мөнгө олж, тэр хэрээрээ үрэхийг хүсдэг, харин нөгөөх нь бага зардлаар ажиллаж, ихийг бүтээх хүсэлтэй байдаг. Би хоёр дахь хэсэгт нь багтдаг.

Хэрвээ чи сайхан үйлчилгээтэй газар орсон бол, ямарваа зүйлээс сайныг мэдэрсэн бол заавал бусдадаа түгээж байгаарай. Үг хүчтэй шүү.

Хэрэгцээгүй хүмүүстэй уулзахад амьдрал хэтэрхий богино шүү дээ.

Бизнес эхэлж буй хүн болгонтой “Яагаад” гэдэг асуулт тулгардаг. Энэ нь сайн асуулт. Гэхдээ нөгөө талд “Яагаад болохгүй гэж” гэх асуулт байгааг санах хэрэгтэй.

Бизнес гял цял зүйлд хэт автах хэрэггүй. Учир нь, тийм зүйл удаан үргэлжилдэггүй.

Эх сурвалж: iToim.mn

SpaceX, TeslaMotors-ын үүсгэн байгуулагч Элон Маск | Tech-News.mn

admin — Mon, 10 May 2021 00:54:41 +0000

Энгийн л гарааны бизнесээс дэлхийн технологийн магнат болтлоо хөгжиж чадсан, тэрбумтан Элон Маск хүн төрөлхтнийг Ангараг гарагт хүргэх мөрөөдөлтэй. Одоо Маскийн эзэмшилд сансрын пуужин, хөгжүүлэлтийн SpaceX, өндөр чанарын, цахилгаан машины Tesla Motors үйлдвэр байдаг. Түүний нийт хөрөнгө 20 тэрбум ам.доллар бөгөөд энэ оны байдлаар дэлхийн хамгийн баян эрхмүүдийн жагсаалтын 21-д эрэмбэлэгддэг. Маскийн зорилго хэзээ ч мөнгө байгаагүй бөгөөд түүнд технологийн хөгжлийг шинэ төвшинд аваачиж, хүн төрөлхтний хөгжлийн хувьсалд өөрийн хувь нэмрээ оруулах гэсэн ганцхан чин хүсэлтэй аж.

Элон Маск гэж хэн бэ

Тэрээр Өмнөд Африкт 1971 онд энгийн гэр бүлд төрсөн бөгөөд аав ээж хоёр нь багад нь хоёр тийш болсноор аавынхаа дэргэд өсчээ. Хамгийн анхны компьютерээ 10 настайдаа авч байсан бөгөөд 12 настайдаа анх БЛАСТАР нэртэй тоглоомын программ бичиж байв. Тоглоомоо 500 доллараар худалдсанаар энэ төрлийн бизнес эхлэх санаа бий болсон бөгөөд 13 настайгаасаа хувьцааны бизнест хөл тавьжээ.17 нас хүрэх үедээ Хатан хааны их сургуульд суралцахаар Канадыг зорьжээ. Өмнөд Африкаас Канад руу, Канадаас АНУ-руу цагаачлах илүү амар байсан учир ийм шийдвэр гаргасан ч гэж үздэг.

Маск өсвөр насандаа сурлага сайтай байсан хэдий ч нийгэмтэй харилцах тал дээр асуудалтай хүүхэд байв. Хүүхдүүдэд их дээрэлхүүлдгээсээ болж, хэд хэдэн удаа сургуулиа сольж байжээ. Гэсэн ч хаана нь ч найзтай болж чадаагүй бөгөөд хүнтэй үг дуугардаггүй, үргэлж ном, сонин шагайгаад сууж байдаг зожиг хүүхэд байсан хэмээн суралцдаг байсан дунд сургуулийнх нь багш өгүүлжээ.

Маск Хатан хааны их сургуульд хоёр жил суралцсаны эцэст тэндээс амжилтад хүрэхэд хэрэг болох хангалттай мэдлэг олж авахгүй нь гэсэн шалтгаанаар Пенсильванийн их сургуульд бизнесийн удирдлага, физикийн ухааны тэнхимд шилжин суралцжээ. Дараагаар нь Стэнфордын их сургуульд докторын зэрэг горилохоор очсон боловч хоёр хоноод л залхаж бизнес эхлүүлэхээр шийдсэн аж.

Ийнхүү 1996 онд ахтайгаа нийлэн ZIP2 нэртэй старт-ап компаниа үүсгэн байгуулав. Тэд програм хангамжийн чиглэлээр үйл ажиллагаа явуулдаг байсан ба гурван жилийн дараа 302 сая ам.доллараар COMPAQ компанид зарж, гучин нас хүрэлгүй саятнуудын эгнээнд элсжээ.

1999 онд XCOM /хожим Paypal болсон/ компаниа үүсгэн байгуулсан бөгөөд үйл ажиллагаа жигдэрч, хувьцааны үнэ хурдацтай өссөнөөр 2002 онд eBay компанид 1.7 тэрбум ам.долларын үнэд хүргэн зарж чадсанаар 160 сая ам.долларыг өөрийн болгов.

2002 онд SpaceX-ээ байгуулсан бөгөөд 2003 онд өөрийн биширдэг алдарт зохион бүтээгч Николас Теслагийн нэрээр нэрлэсэн Tesla Motors-оо байгуулсан юм. Мөн 2006 онд нарны эрчим хүчийг ашиглах чиглэлээр үйл ажиллагаа явуулдаг SOLAR SYSTEM компанийн өндөр хөрөнгө оруулагч болжээ.

Мөн тэрээр 2016 оноос хойш АНУ-ын ерөнхийлөгч Доналд Трампийн ойрын зөвлөхийн үүрэг гүйцэтгэж байгаа билээ.

Түүнийг дэлхий нийт хоёр дахь Стив Жобс гэдэг бөгөөд тэдний хувь хүний зан чанарт амархан залхдаг, түргэн ууртай, олон эхнэрээс салсан, үргэлж ажил хэргээ нэгдүгээрт тавьдаг зэрэг төстэй зүйл олон. Мэдээж хамгийн чухал нь Маск технологийн хөгжилд, тэр тусмаа сансар судлалд өндөр хувь нэмрээ оруулж буй нь Стив Жобстой харьцуулагдах хэмжээний зохион бүтээгч, магадгүй суут ухаантан болохыг нь баталж буй юм.

Түүний амжилтын нууцаас

Дэлхий нийтийг гайхшируулдаг зүйл бол дан ганц түүний амжилт биш бөгөөд хувь хүний зан чанар нь ч онцгой содон гэнэ. Энэ байдлыг нь ч түүний амжилтын гол түлхүүр байсан гэж үзэх хүн цөөнгүй. Түүний амьдрал, намтар, амжилтын нууцыг өгүүлсэн ЭЛОН МАСК ном 2015 онд хэвлэгдэж байсан бөгөөд гарсан даруйдаа хэдэн сая хувь борлогдсон юм. Номын агуулгаас түүний амжилтын нууцыг дэлгэвэл.

Тэр хэзээ ч өөртөө ханаж байгаагүй. Tesla motors-д зуу зуун хүн илүү цагаар ажиллаж байсан өдрүүдэд ч тэр үргэлж БИД СУЛХАН БАЙНА, ИЛҮҮ ИХ АЖИЛЛАХ ХЭРЭГТЭЙ гэж хэлдэг байсан.

Амралт, ая тухыг чухалчилдаггүй. 2000 онд амралтаа авч, Бразил, Өмнөд Африкт аялах үедээ хумхаа өвчин тусаж, хүнд өвджээ. Тэр цагаас хойш Амралт зугаалгын тухай хамгийн сайн ойлгосон нэг зүйл бол АМРАЛТ ЧАМАЙГ АЛАХ БОЛНО гэж хэлсэн бөгөөд дахин хэзээ ч амраагүй байна.

Зөвхөн сайн, их ажиллахыг шаарддаг удирдагч бус, өөрөө хамтдаа, магад бүр илүү ажилладаг МАНЛАЙЛАГЧ. PAYPAL төсөл дээр хамтран ажиллаж байсан Жюли Акенбрандт БИД ӨДӨРТ 20 ЦАГИЙН ТУРШ АЖИЛЛАДАГ БАЙСАН. Харин Маск 23 цаг ажилладаг байв” хэмээн өгүүлжээ.

Ажил хэрэг нэгдүгээрт. Эхнэрээ төрөх үед хажууд нь байхыг хүсэн компанийн үйл ажиллагаанд оролцоогүй ажилтан руугаа ЭНЭ БОЛ УУЧЛАЛТ ГУЙХ ХАНГАЛТТАЙ ШАЛТГААН БИШ. МИНИЙ УРАМ ХУГАРЧ БАЙНА. ЧИ ЮУ БОЛОХЫГ ӨӨРӨӨ БҮРЭН УХАМСАРЛАХ ЁСТОЙ БАЙСАН ЮМ. БИД ДЭЛХИЙГ ӨӨРЧЛӨХӨӨР АЖИЛЛАЖ БАЙНА гэсэн имэйл бичиж, ажлаас нь чөлөөлж байв.

Ялагдал, алдаа дутагдлыг үзэн яддаг. Маск өөрийгөө энэ тал дээр Самурайн сэтгэхүйтэй хэмээсэн тодорхойлсон ба алдаа гаргаж байхаар Харакири хийж амиа егүүтгэхийг илүүд үзнэ гэж хэлж байсан удаатай.

Түүний үгийн санд бууж өгөх гэдэг үг үл оршино. 2006-2008 онд SpaceX-с хөөргөсөн бүх пуужин дэлбэрч, дөрвөн ч хиймэл дагуулыг мөргөн сүйрүүлжээ. Үүнээс үүдэн компани маш өндөр алдагдал хүлээж, дампуурлын ирмэгт очив. Гэсэн ч компани дампуурлаа зарлахаас ердөө хэдхэн цагийн өмнө Маск 1.6 тэрбумын хөрөнгө оруулагч олж чадсанаар нэг жилийн дараа дөрөв дэх оролдлогоороо Space Falcon пуужингаа амжилттай хөөргөж байв.

Өөрийгөө голж байсан удаа үгүй. Дөнгөж 18 настай өдөрт 20 ам.долларын цалин авдаг оюутан хүү сонин, сэтгүүл дээрээс уншиж мэдсэн, бизнесмэн, амжилттай яваа хүмүүстэй уулзаж, санал бодлоо солилцохоор өдрийн хоолонд урьдаг байв.

Мөнгө хэзээ ч чухал биш. БИ ӨӨРИЙН БҮХ МӨНГӨӨ КОМПАНИУДДАА ЗОРИУЛААД, ЭХНЭРИЙНХЭЭ ЭЦЭГ ЭХИЙН ГРААШИД АМЬДРАХАД Ч БЭЛЭН БАЙНА гэж найздаа өгүүлж байв.

Маскийн амжилтын нууцыг гурван зүйлд байсан хэмээн investopedia.com үзсэн бөгөөд тэдгээрийг товчоор өгүүлбэл:

1. Хүсэл тэмүүллийн тодорхой мэдрэмжтэй. Буюу хийж бүтээх гэсэн хүсэл эрмэлзэл нь бизнесийн ухаантай нэгдэж чадсан явдал.

2. Өөрөө суралцах чадвар, тасралтгүй эрэл хайгуулч шинж: Мэдлэгийг заавал хэн нэг багшаар биш өөрөө олж авахыг илүүд үздэг байдал. Маск 8 нас хүрэх үедээ унших номгүй болж, Британика нэвтэрхий толийг бүтнээр цээжилсэн байв. 12 насандаа өөрийнхөө шаргуу оролдлогын үр дүнд анхны компьютерийн програмаа бичиж байсан . 2001 онд ч сансрын пуужин бүтээх үйл явцыг өөрөө уншиж, олж мэджээ.

3. Хэцүү явдалтай нүүр тулсан ч шантрахгүй байх чадвар: 14 настайдаа дэлхийг өөрчлөх гэсэн агуу зорилго тавьсан цагаасаа олон шалгаруулалттай нүүр тулсан ч алинд нь бууж өгөөгүй. 17 настай их сургуулийн шинэхэн оюутан байхдаа өдөрт ердөө нэг доллараар хэрэгцээгээ хангадаг байв. Тэрээр хэрвээ ердөө ийм хэмжээний мөнгөөр өөрийнхөө хэрэгцээг бүрэн хангаад сурчих юм бол бизнесээ ч мөн бага хэмжээний хөрөнгөөр амжилттай эргэлдүүлж чаддаг болоход суралцана хэмээн бэлтгэл хийдэг байсан нь яах араггүй түүний амжилтын гол нууцын нэг юм.

Түүнчлэн Маск эхний компаниуд нь үргэлж түүний ар нуруунд хутга зоодог буюу захирлын суудлаас нь буулгаж, хувьцааг нь булаахыг оролдож байсан тухай ам алдаж байв. Тухайлбал Paypal-д ажиллаж байх үедээ хуримаа хийсэн билээ. Гэтэл түүнийг бал сарын амралтаараа явж байх үед хувьцаа эзэмшигчид хуралдан захирлын суудлаас нь огцруулж байв. Энэ явдлыг Paypal компанийг eBay-д зарсан гол шалтгаануудын нэг ч гэж үзэх хүн бий.

Одоогоор түүний хамгийн гол зорилго бол 2031 он гэхэд хүн төрөлхтнийг Ангараг гарагт аваачих бөгөөд, өнгөрсөн 7-ны өдөр дэлхийн хамгийн хүчирхэг, сансрын хөлөг FACLON HEAVY -г задгай сансарт амжилттай хөөргөсөн билээ. Үнэхээр л өөрийн зорилго буюу хүн төрөлхтний хөгжлийн тусын тулд тасралтгүй ажиллаж байгаа бөгөөд хэдэн ч удаа бүтэлгүйтсэн ч АНГАРАГ ГАРАГТ ХҮРЭХДЭЭ Л ХҮРЧ, ТЭНД ЯСАА ТАВИХ АНХНЫ ХҮН БОЛОХ БОЛНО. ГЭХДЭЭ МЭДЭЭЖ ОСЛООР БИШ гэж хэлж байв.

Түүний тухай олон зуун, өгүүлэл, нийтлэлүүд байдгаас хамгийн оносон өгүүлбэрийг Жефф Хамербак ОДОО ҮЕИЙН ТЕХНОЛОГИЙН КОМПАНИУД ХЭРЭГЛЭГЧДЭД ЗОРИУЛСАН, ДОНТУУЛАХ МАГАДЛАЛТАЙ, ХӨНГӨХӨН АПП ҮҮСГЭЖ, ХУРДХАН ШИГ IPO ХИЙН ХЯЛБАР МӨНГӨ ОЛОХЫГ ЧУХАЛЧИЛДАГ БОЛСОН. ХАРИН ЭЛОН МАСК ЭСРЭГЭЭРЭЭ САНСАР СУДЛАЛ, АВТОМАШИН, ЭРЧИМ ХҮЧНИЙ САЛБАРУУДАД ХУВЬСГАЛД ДҮЙХҮЙЦ НЭЭЛТИЙГ ХИЙЖ БАЙНА хэмээн Элон Маск номонд өгүүлжээ.

Маск сүүлийн жилүүдэд бий болж буй хиймэл оюун ухааны хурдацтай хөгжлийг аюулын харанга гэж харж буйгаа илэрхийлээд байгаа. Тэрээр хиймэл оюун ухаанаас үүдэн дэлхийн гуравдугаар дайн технологийн салбарт үүсэж болзошгүй тул, хүн төрөлхтнөөс илүү ухаантай машин зохион бүтээхдээ болгоомжтой хандахыг дэлхий нийтэд уриалсан юм.

Түүний ажиллах арга барил ба цагийн менежмент

Бизнесийнхээ эхэн үеэр Маск долоо хоног 80-100 хүртэлх цагийг ажиллаж өнгөрөөдөг, өдөрт ердөө 2-3 цаг л унтдаг байв. Харин 2015 онд өгсөн ярилцлагадаа өдөрт 12.1 цагийг ажил дээрээ өнгөрүүлдэг. Шөнийн нэг цагаас өглөөний долоон цаг хүртэл өдөрт зургаан цагийг унтаж өнгөрүүлдэг. Энэ тухай УНТАЖ, ИДЭХ ХЭРЭГЦЭЭГ ҮГҮЙ БОЛГОВОЛ АЖЛЫН БҮТЭЭМЖ ХЭЧНЭЭН ДЭЭШЛЭХИЙГ ТААШГҮЙ, БОЛДОГ БОЛ ТЭР ЦАГТАА Ч АЖИЛЛАХ ЮМСАН хэмээн өгүүлж байжээ.

Түүний хэлсэн эшлэлүүдээс

Тэвчээр бол амжилтад хүрэхэд хэрэг болох хамгийн том зэвсэг. Хэн нэгэн чамд бууж өгөхийг тулгаагүй л цагт, хэзээ ч бууж өгч болохгүй.

Боловсролыг төгссөн сургуулиар нь бүү дүгнэ. Би Харвардын төгсөөгүй ч төгссөн хүмүүс нь надад ажилладаг.

Онцгой хэн нэгэн болох уу, энгийн уйтгартай нэгэн байх уу гэдгээ сонгох сонголт үргэлж байдаг.

Амьдрал өшөө хорсолд автан оршиход хэтэрхий богино.

Бүтэлгүйтэл бол тэр чигтээ боломж. Хэрвээ чи ямар нэг байдлаар бүтэлгүйтэхгүй байгаа бол чи юу ч бүтээгээгүй байна гэсэн үг.

Хэрвээ чи ямар нэгэн зүйл үнэхээр чухал гэж бодох л юм бол бүтэлгүйтэл дагуулах байсан ч хамаагүй заавал хий, оролдох хэрэгтэй.

Бусад хүмүүс долоо хоногт 40 цаг ажилладаг байх нь хамаагүй. Чи үүнийг нь 100 болгочих хэрэгтэй. Тэгж гэмээнэ бусдын бүтэн жил хийх ажлыг дөрөвхөн сарын дотор нугалах боломж бүрдэнэ.

Өглөө сэрэхдээ л энэ өдөр хамгийн сайхан, хамгийн бүтэмжтэй өдөр байх болно гэж бодох хэрэгтэй. Тэгж чадахгүй бол тийм байх ч үгүй.

Эх сурвалж: Biography.com, Inc.com, investopedia.com, Forbes, iToim

Дэлхийн хамгийн залуу тэрбумтан SNAPCHAT-ыг үндэслэгч Эван Шпигел | Tech-News.mn

admin — Sun, 09 May 2021 01:01:20 +0000

Дэлхийн хамгийн залуу өөрийн чадлаар /self made/ хөлжсөн тэрбумтан, залуусын идэвхтэй хэрэглэх болсон нийгмийн сүлжээний үндэслэгч Эван Шпигелийн амьдрал, амжилтын нууцаас өгүүлье.

-Эван Шпигел нь 1990 оны зургадугаар сарын 4-нд АНУ-ын Лос-Анжелес хотод төржээ. Түүний эцэг эх хоёулаа өндөр боловсролтой, дээд зэрэглэлийн хэрэг дээр ажилладаг өмгөөлөгчид учир Эван дутагдаж гачигдах юмгүй өсжээ.

Тэрээр Санта Моника дахь “Crossroads” гэх элит сургуульд суралцаж байсан аж. Энэ сургуульд ТИНДЕР-ийн үүсгэн байгуулагч Сиан Радд, Кейт Хадсон зэрэг алдартай эрхмүүд мөн суралцаж байсан юм. Эван сургуульд байхдаа хичээлдээ сайн, олон нийтийн дунд нэр хүндтэй, элит хэрэглээтэй хүүхэд байжээ. Арван зургаан настай байхад нь аав ээж хоёр нь салж, сэтгэл санааны хүнд дарамтад орж гэрээсээ зугтаж байсан ч аав нь түүнд 75 мянган ам.долларын үнэтэй BMW машин бэлэглэснээр асуудал бүрэн шийдэгдэж байсан гэдэг.

Ахлах сургуулиа төгсөөд Эван Стэнфордийн их сургуульд үйлдвэрлэлийн дизайн мэргэжлээр суралцаж байх үедээ Snapchat-ыг хамтран байгуулсан Рэжжи Браун, Бобби Мерфи нартай танилцаж байжээ. Оюутнууд хичээлийн бие даалтын ажил болгож өвөрмөц маягийн мессенжер зохиох санаа гаргасан байна. Хэрэглэгчдийн нэг нэгэндээ илгээсэн мэдээлэл нь хэсэг хугацааны дараа устдаг, олон төрлийн сонирхолтой байдлаар зурвас илгээх боломжтой гэсэн гол санаанд тулгуурлан SNAPCHAT-ыг анх PICTABOO нэртэйгээр танилцуулж байжээ.

PICTABOO-ын үйл ажиллагаа дөнгөж эхэлж байх үед үүсгэн байгуулагчдын нэг Режжи Браун энэ бүхэн өөрийнх нь санаа тул компанийн 30 хувийг дангаараа эзэмших хүсэлтэй байсан нь зөрчилдөөн үүсгэж, Эван, Бобби нар түүнийг компаниасаа гаргаж, түүний акаунтуудыг нь блоклож байжээ. Браун 2014 онд энэ асуудлаар шүүхэд хандан SNAPCHAT-аас 157 сая долларын нөхөн олговор авч байсан юм.

Ийнхүү Эван, Бобби нар 2012 оны тавдугаар сард компанийнхаа нэрийг SNAPCHAT болгон өөрчилж албан ёсоор байгуулж байжээ. Компанийн санааг бүгд хамтран гаргасан ч Эван Шпигел гол дизайн, загварыг нь зохиосон бөгөөд, залуус одоо тус бүр компанийнхаа 25 хувийг эзэмшдэг. Тухайн үед тэдэнтэй ижил үйлчилгээ явуулдаг компаниуд байсан ч дүрсийн чанар муудах, их багтаамж шаардаж байсан учраас удаан оршин тогтнож чаддаггүй байжээ. Компанийн эхэн үед Эван бүхий л цаг заваа SNAPCHAT-ын хөгжүүлэлтэд зориулж байсан учир эцэг эхийнх нь санаа зовж, бусад хичээлдээ анхаарлаа хандуулахыг анхааруулж байсан гэдэг.

Залуус сүлжээний гол хэрэглэгчдээ өсвөр насныхан байхаар төлөвлөж зохион бүтээсэн нь хэдхэн сарын дотор гайхамшигтайгаар тэлж, компани байгуулагдсанаас таван сарын дотор 1 тэрбум зурагт зурвас дамжуулсан ба өдөр бүр 20 сая хэрэглэгчид зурвасаар харьцдаг болсон байна.

Үүсгэн байгуулагдаад ердөө нэг жилийн дараа Фэйсбүүк компанийн үүсгэн байгуулагч Марк Зукерберг Эвантай өөрийн биеэр уулзан компанийг нь 3 тэрбум ам.доллараар худалдаж авах санал тавьсан ч татгалзаж байсан юм. Тухайн үед олон судлаач, эдийн засагчид тэднийг байж болох хамгийн сайхан саналаас татгалзлаа хэмээн буруутгаж байсан ч ердөө найман сарын дараа компанийн зах зээл дээрх үнэлэмж 5 тэрбумд хүрч Эван, Бобби нар дэлхийн хамгийн залуу тэрбумтнуудын нэг болцгоосон юм. Энэ үед Эван, Бобби нар дөнгөж 24 настай байжээ.

Эван SNAPCHAT-ыг байгуулсан тухайгаа БИД ТИЙМ Ч ДОГЬ ЗАЛУУС БАЙГААГҮЙ, ТИЙМ БОЛОХООР ИЛҮҮ ДОГЬ ЗҮЙЛ БҮТЭЭХИЙГ ХҮССЭН гэж хэлж байжээ. Түүнийг Фэйсбүүкийн Марк Зукербергтэй олон талаар төстэй гэдэг бөгөөд тэд хоёулаа алдартай хуульчийн гэр бүлээс гаралтай, оюутан байхдаа төслөө эхлүүлж, амжилтад хүрсэн, хамтрагчтайгаа шүүхдэлцэж байсан зэрэг нийтлэг тал олон юм. Гэхдээ Эван өөрийгөө түүнтэй адилхан гэж тодорхойлдоггүй бөгөөд БИ КОМПЬЮТЕР МЭДДЭГ ХҮН БАЙЖ БОЛОХ Ч ТЕХНОЛОГИЙН ДОНТОГЧ БИШ гэж байжээ.

Мөн Эваны санааг ФЕЙСБҮҮК компани хулгайлсан гэх асуудал олон гардаг бөгөөд 2013 онд тэрээр Марк Зукербергтэй уулзах үедээ poke цэсний тухай ярьж байсныг нь төд удалгүй Фэйсбүүк хөгжүүлж байсан юм. Үүнээс үүдэн Эван хамтрагч Боббитой муудалцаж байсан гэдэг. SNAPCHAT-ын өөр олон төрлийн цэсийг ФЕЙСБҮҮК компани хулгайлсан бөгөөд гэдэг энэ тухай Эван YAHOO хайлтын системтэй боллоо гээд GOOGLE болчихгүй гэж байжээ.

Эван Шпигелийн хөрөнгө одоо 2.5 тэрбум ам.доллар бөгөөд Forbes сэтгүүл түүнийг Марк Зукербергийн дараахь дэлхийн хоёр дахь хамгийн залуу тэрбумтан хэмээн нэрлэсэн. Эваны ажлаа хэрхэн явуулдаг, болон хувийн амьдралын тухай мэдээллүүд өндөр нууцлалтай байдаг бөгөөд, компанийн ажилчид, байгууллагын томоохон шийдвэр, хамтын ажиллагааг хэрэгжиж эхлэхийн өмнө олон нийттэй хамт мэддэг аж. Энэ нь технологийн шинэ санааг хулгайд алдахаас сэргийлэх аргатай холбоотой байна.

Одоо дэлхий даяар SNAPCHAT-ыг өдөрт 187 сая идэвхтэй хэрэглэгчтэй, сонирхолтой зураг, бичлэгээр харилцсаар байгаа бөгөөд компанийн зах зээл дээрх үнэлэмж 33 тэрбум ам.долларт хүрээд байгаа юм.

SNAPCHAT-ын үндэслэгчид өнгөрсөн оны хоёрдугаар сард тус компанийн 13 сая ширхэг хувьцааг 15-20 жилийн дотор, сурах эрмэлзэлтэй ч санхүүгийн боломжгүй, шилдэг сурагчдын сургалтын төлбөр, боловсролын орчинг сайжруулахад хандивлахаар болж, төсөл хэрэгжиж эхлээд байгаа юм. Тэд боловсрол мэдлэгийн асуудлыг шийдэж чадвал нийгмийн бусад асуудлууд дагаад сайжирна гэж итгэж буйн үндсэнд тус төслийг эхлүүлсэн байна.

Эван Шпигелийн хэлсэн эшлэлүүдээс

– Амьдралд дахин давтагдахгүй тэр мөчүүдийг хайртай хүмүүстэйгээ хуваалцах нь л хамгийн үнэ цэнэтэй.

– Бусдад юу хэлэх эсэхээ сайн бодож, эргэцүүлж байх нь бизнес эрхлэхийн хамгийн хүнд хэсэг.

– Амжилтад хүрэх нууц нь их ажиллахдаа биш, төлөвлөгөөтэй ажиллахад оршино.

– Хүмүүст үргэлж чиний тухай ямар нэг бодол байдаг. Тэр бодлын тухай, түүнийг өөрчлөх тухай байнга бодохын оронд, өөрийгөө жаргалтай байлгах тухай бодсон нь хамаагүй хялбар.

Эх сурвалж: forbes, BusinessInsider , ABC

Жиргээг үүсгэн байгуулагч Жак Дорсейгийн амжилтын түүх | Tech-News.mn

admin — Fri, 07 May 2021 01:48:15 +0000

Жак Дорсей бага насандаа өөрийн сонссон, мэдсэн бүхнээ бусдад ярьж өгөх дуртай байсан нь үеийн хүүхдүүддээ яршигтай, үргэлж чалчиж байдаг нэгэн гэж гоочлогдож явахад хүргэжээ. Нэгэн сэтгэл зүйч түүний энэ байдлыг сэтгэцийн өөрчлөлт гэж оношилж, эмчилгээний арга хүртэл санал болгож байсан аж. Гэхдээ хожим бусдад гадуурхагдаж байсан тэр зан чанар нь түүнийг тэрбумтан болгосон юм. Твиттерийг үүсгэн байгуулагч Жак Дорсей өнөөдөр Билл Гейтс, Стив Жобс, Марк Цукерберг, Элон Маск нарын адил технологийн салбарын түүхэн дэх хамгийн агуу манлайлагчдын нэг болжээ.

Тиймээс цахим нийгмийн сүлжээний үйлчилгээ үзүүлэгч Твиттер болон цахим төлбөр тооцооны “Square” гэх компаниудын үүсгэн байгуулагч Жак Дорсейг “Дэлхийг өөрчлөгч эрхмүүд” цувралдаа онцолж, таксины жолоочоос дөрвөн тэрбум ам.долларын хөрөнгөтэй болсон сонирхолтой амжилтын түүхийг нь хуваалцаж байна.

“Та хийх ёстой ажлаа дуусгаагүй бол юу ч хийгээгүй гэсэн үг” Жак Дорсей

Англи, Ирланд болон Итали цустай Жак Патрик Дорсей нь 1976 оны арваннэгдүгээр сарын 19-нд АНУ-ын Миссури мужийн Сент-Луис хотод мэндэлжээ. Түүний аав нарийн дүн шинжилгээний технологи зохион бүтээгч нэгэн байжээ. Католик шашинтай гэр бүлд өссөн тэрээр шашны сургуулиудаар дунд, ахлах боловсрол эзэмшжээ. Түүний хүүхэд насны баатар нь Нью-Йорк хотын дарга асан Майкл Блүүмберг бөгөөд тэрээр тус хотын дарга болно гэж мөрөөддөг байжээ.

Гоц ухаантан Жак

Жак Дорсей 14 наснаасаа эхлэн компьютерын программ хангамжийг сонирхох болжээ. Тэрээр 15 насандаа тээврийн үйлчилгээний салбарын компаниудын зохион байгуулалтад тулгарч байсан жолооч нар бие биетэйгээ байнга холбоотой байх технологийн шаардлагыг олж харан мэдээлэл дамжуулах, диспетчерийн систем зохион бүтээсэн нь өнөөдөр ч гэсэн бүх такси компаниудад өргөн ашиглагдаж байна. Энэ үедээ Жак Дорсей “Mira Digital Publishing” гэх жижиг компанид дадлагажигч хийж байжээ.

Сонирхолтой нь тус компанийн захирал Жим Маккелви хожим Жак Дорсейтэй хамтран “Square”-ыг үүсгэн байгуулсан байдаг. Жим Маккелви түүний талаар “Тэр анх манай компанид дадлага хийж эхлэхдээ их жоохон хүүхэд байсан. Гэхдээ тэр анхнаасаа л намайг алмайруулж эхэлсэн. Тэгээд би үнэхээр онцгой тэр жаалыг гоц ухаантан Жак гэж дуудах болсон юм. Одоо ч гэсэн би түүнийг гайхалтай зүйл хийх үед нь ингэж дууддаг” гэжээ.

Ажилд орохын тулд ажил олгогч компаниа хакердаж байжээ

Ингээд өөрийн сонирхлоо дагаж Миссуригийн Шинжлэх ухаан технологийн их сургуульд программ хангамжийн инженер мэргэжлээр элсэн суралцсан ч хоёр жил хагас сураад Нью-Йорк хотод нүүн очиж Нью-Йоркийн их сургуульд шилжин суралцах болжээ.

Тухайн үедээ Жак Дорсей Нью-Йорк хотын нэгэн том диспетчер компанид ажилд орохыг үнэхээр их хүсэж байжээ. Харамсалтай нь тус компанийн веб сайтад холбоо барих ямар ч мэдээлэл байгаагүй учир, хамгаалалтын цоорхойг нь илрүүлэн, түүгээр дамжин дотоод сүлжээнд нь нэвтэрч хүний нөөцийн ажилтнуудынх нь имейл хаягийг олж аваад хэрхэн дотоод сүлжээгээ аюулгүй, найдвартай болгох зааврыг холбоо барих дугаарын хамт илгээжээ. Ингээд нэг долоо хоногийн дараа тэрээр хүссэн ажилдаа уригдан оржээ.

Нью-Йорк хотод жил орчим амьдарсныхаа дараа Жак Дорсей яг төгсөх семестртээ, дипломоо гардаж авалгүй Билл Гейтс, Стив Жобс, Марк Цукерберг нарын адил их сургуулиа хаяж Калифорни мужийн Цахиурын хөндийг зорьжээ. Ингээд 2000 онд Жак Дорсей анхны компаниа байгуулж, өөрийн диспетчерийн системээ веб сайтаар дамжуулж санал болгох болжээ.

Жиргээг зохион бүтээсэн нь

Компаниа байгуулаад удаагүй байхад нь түүнд нэгэн гайхалтай санаа орж ирсэн нь диспетчерийн системээ шууд текст мессежээр харьцах боломжтой цогц шийдэл болгох явдал байв. Ингээд тэрээр үүнийгээ ажил хэрэг болгохын тулд Цахиурын хөндий дэх “Odeo” гэх компанид ханджээ. Энэ талаар тус компанийн Гүйцэтгэх захирал асан Биз Стөүн “Жак анх бидэнд дээр ирээд. – Чи өөрийнхөө яг одоо хийж байгаа зүйлсийг текст ашиглан бусад хүмүүстэй шууд хуваалцаж чаддаг бол ямар вэ гэж хэлсэн. Тухайн үед би тоомжиргүй дүр эсгэж байсан ч дотроо бол хөөх янзтай, үнэхээр гайхалтай санаа байна гэж бодож байлаа” гэж ярьж байжээ.

Жак Дорсейн хэрэглэгчид 140 тэмдэгт ашиглаж хоорондоо санал бодлоо солилцох болно. Үүнийгээ “Tweet” буюу жиргээ гэж нэрлэнэ. Учир нь хүмүүс яг л өглөө бүр шувууны жиргээнээр өдрийн эхлэлийг мэдэрдэг шиг, манай сайтыг өглөө сэрмэгцээ шалгадаг болно гэж хэлсэн нь “Odeo”-ын удирдлагуудад хамтарч ажиллах гол шийдвэрээ гаргахад нь нөлөөлжээ. Ингээд Жак Дорсей, Биз Стөүн нар багтаа Эван Уиллиамыг нэгтгэж хожим “Twitter” гэж нэрээ өөрчилсөн “Obvious” компанийг байгуулж, Жак Дорсейг Гүйцэтгэх захирал болгожээ.

Залуус эрчимтэй ажилдаа орж Жак Дорсей эхний хоёр долоо хоногт энгийн загвартай веб сайт зохион бүтээж, www.twttr.com гэх домайн нэр авчээ. Учир нь тухайн үед тэдний өнөөгийн www.twitter.com хаягийг өөр хэн нэгэн эзэмшиж байжээ. Гэхдээ тэд веб сайтаа нээснээс зургаан сарын дараа үүнийг өөрсдийн болгож авсан байна.

Ингээд тэд твиттерийг алхам алхмаар хөгжүүлсээр 2006 оны долдугаар сарын 15-ны өглөөний 9 цаг 50 минутад Жак Дорсей анхны жиргээг “just setting up my twttr” гэж хийснээр албан ёсоор үйл ажиллагаагаа эхлүүлж байжээ. Нэг жилийн дараа гэхэд твиттерт өдөрт 20,000 жиргээ хийгддэг болсон байв.

Жиргээний эрин үе

Твиттерийн хэрэглэгчдийн тоо 2007 оны “SXSW” хөгжмийн фестивалийн үеэр огцом өссөн юм. Тэд тоглолтын тайз болон хурлын танхимын голд том дэлгэц байршуулан, уг фестивальд оролцож буй хүмүүсийн жиргээг шууд харуулж байсан нь уг арга хэмжээг маш эерэг уур амьсгалтай болгож байжээ. Үүний дараа өдөрт хийгддэг жиргээний тоо 60,000 болж өссөн байна. Мөн тус фестивалийг үзэж сонирхсон “NASA”-ын хэд хэдэн мэргэжилтэн албан мэдэгдлээ твиттер ашиглан хийж эхэлсэн нь хүмүүсийн сонирхлыг маш ихээр татаж эхэлсэн аж.

Энэ нөлөөлөл телевизийн салбарт хүрч, хэвлэл мэдээллийн байгууллагууд твиттер ашиглаж эхэлсэн байна. Төд удалгүй алдарт хөтлөгч Конан Обрейн өөрийн шоундаа хөгжилтэй, асуудал хөндсөн жиргээнүүдийг онцлох болсон аж.

Харин 2008 оны АНУ-ын Ерөнхийлөгчийн сонгуулийн үеэр нэр дэвшигч Барак Обама твиттерийг өөрийн сонгуулийн сурталчилгааны гол суваг болгон ашигласан нь бүх нийтийн хэрэглээ болох хамгийн том түлхэц болжээ. Үүний дараа 2009 оны Ираны сонгуулийн үеэр эрх баригчид улс даяарх бүх мессеж үйлчилгээ, гаднын хэвлэл мэдээллийн хэрэгслийг хориглосон бөгөөд сөрөг хүчний дэмжигчид твиттер ашиглан шуурхай мэдээг түгээж байсан нь өнөөгийн улс төр, нийгмийн зүтгэлтнүүдийн дунд түлхүү хэрэглэгдэх эхлэл болсон байна. Твиттер 2013 онд хөрөнгийн зах зээлд IPO гаргасан бөгөөд эхний өдрийн арилжааны нэг ширхэг хувьцааны үнэ 26 ам.доллараас эхэлж нэгхэн цагийн дотор Жак Дорсей болон бусад үүсгэн байгуулагчид бүгд тэрбумтан болжээ.

Жак Дорсей твиттерийг орхисон нь

“Үүсгэн байгуулагч гэдэг бол ажил, албан тушаал биш. Энэ бол үүрэг хариуцлага, зөв хандлага юм” Жак Дорсей

Тэрээр энэ хугацаанд твиттерийн төлөө бүхнээ зориулсаар ирсэн ч 2008 онд ТУЗ-ын шийдвэрээр Гүйцэтгэх захирлын албан тушаалаас чөлөөлөгдөж байсан юм. Үүний шалтгаан одоо хэрнэ үл мэдэгдэх хэвээр байдаг.

Харин энэ үед твиттерийг авахаар идэвхтэй хөөцөлдөж байсан фэйсбүүкийн үүсгэн байгуулагч Марк Цукерберг ажилгүй болсон Жак Дорсейг компанидаа урьж, өндөр албан тушаал санал болгож байсан ч зөвшөөрөөгүй байна. Үүнийг твиттерийг сайн мэддэг хүнээр буюу өөрийг нь өөрөөр нь худалдан авахуулах Марк Цукербергийн төлөвлөгөө байсан гэдэг.

Жак Дорсей 2011 онд твиттерийн Гүйцэтгэх захирлын албан тушаалд буцаан авсан байдаг. Энэ явдал ч компанийн нууц хэвээр үлдсэн бөгөөд үүнийг IPO гаргахтай холбон тайлбарладаг. Учир нь хөрөнгө оруулагчид, санхүүгийн батлан даагчид үүсгэн байгуулагчаа шахаж гаргасан компанид итгэхийг хүсээгүй гэж үздэг.

Жак Дорсей санхүүгийн үйлчилгээний зах зээлд хувьсгал хийхийг зорив

Твиттер нь 2010 он гэхэд дэлхий дахинд 105 сая хэрэглэгчтэй болж өдөрт 55 сая жиргээ хийгдэх болсон байна. Энэ нь хүн төрөлхтний мэдээлэл солилцох байдалд хувьсгал хийсэн ч Жак Дорсей үүгээр хязгаарлагдахыг хүсээгүй юм. Энэ удаад тэрээр хүмүүсийн төлбөр төлөх аргад хувьсгал хийхээр шулуудаж цахим санхүүгийн үйлчилгээ эрхлэгч “Square” компанийг 15 настай байхад нь анх ажил олгосон Жим Маккелвитэй хамтран байгуулжээ. Тус компани нь ухаалаг гар утас, цахим нийгмийн сүлжээний платформуудыг тулгуурлан хэрэглэгчдэд цахим төлбөр тооцооны карт санал болгодог.

Түүний ухаалаг төлбөр тооцооны үйлчилгээ нь гол өрсөлдөгч болох зах зээлд нэгэнт байр сууриа олсон “PayPal”-аас хэд дахин хурдан өсөж байгаа бөгөөд 2016 оны байдлаар “Square app”-ыг гар утсандаа татаж авсан хэрэглэгчдийн тоо 128 хувиар өссөн байна. Мөн тус компани тун удахгүй IPO гаргахаар төлөвлөж байгаа аж.

Хувийн амьдрал

Жак Дорсей хүүхэд байхаасаа загвар өмсдөг бөгөөд өнөөдөр 42 настай ч гэр бүлтэй болж амжаагүй л явна. Бизнесийнхээ хажуугаар иогоор идэвхтэй хичээллэж, хувцас загвар салбарт орохоор зэхэх болжээ. Тэрээр Цахиурын хөндий дэх твиттерийн төв оффист өөрийн гэсэн тусдаа өрөө байтугай ажлын ширээ ч үгүй аж. Үүнийгээ ажилчидтайгаа илүү ойр байхын тулд гэж тайлбарладаг байна.

Мөн Жак Дорсей 2013 оноос боловсрол, эрүүл мэндийн чиглэлээр үйл ажиллагаа явуулдаг байгууллагуудыг сонгож жил бүр нэг сая ам.доллар хандивлах болжээ.

Өнөөдрийн байдлаар твиттер нь 275 сая идэвхтэй хэрэглэгчтэй болсон бөгөөд тэд өдөрт ойролцоогоор 500 сая, жилд 200 тэрбум жиргээ хийдэг байна.

“Бидний хийсэн бүхэн бол ердөө л харагдах байдал. Үүнээс илүү зүйлийг бүтээх нөөц бололцоо твиттерт бүрэн бий. Аливаа зүйлийн ашиг тус заавал нүдэнд ил байх албагүй” Жак Дорсей

Эх сурвалж: People, What Success, CNBC

Жон Неш: Бүтэшгүй, ер бусын зүйл шиг санагдсан бүх зүйлд боломж бий | Tech-News.mn

admin — Fri, 07 May 2021 01:30:36 +0000

Приснтоны их сургуулийн эрдэмтэн байсан түүнийг шинжлэн ухааны хүрээлэнгийнхэн гоц ухаантан, дараагийн Эйнштэйн хэмээн цоллодог байв. Түүний хувийн амьдрал онол шиг нь дардан байгаагүй бөгөөд сэтгэцийн өвчлөлийн хамгийн хүнд хэлбэр болох шизофрений өвчинтэйгөө насан туршдаа тэмцсэн юм.

Жон Форбес Нэш 1928 оны зургадугаар сарын 13-нд Баруун Виржиния хотод цахилгааны инженер, англи хэлний багш нарын ууган хүү болж төржээ. Бусад гоц ухаантнуудаас өөр нь сургуульдаа дунд сурдаг энгийн хүү байсан аж. Энэ тухайгаа Нэш “Манай сургуульд математикийг маш уйтгартай заадаг байсан учир би ихэнх цагаа химийн туршилт хийж, эвсэл ном уншиж өнгөрөөдөг байсан” хэмээн тайлбарлаж байв. 14 настайдаа Эрика Т. Беллын “Агуу математикчид” ном түүнийг математикийн шинжлэх ухаанд татагдах эхний алхмыг тавьсан гэнэ. Нэгэнт сургуульд нь зааж буй хичээл уйтгартай санагдсан учир Нэш математикийг бие даан судалж, алхах сургуулийн сурагч байхдаа “Фермийн бага онол”-ын учрыг түвэггүй олдог сургуулийнхаа баатар болжээ. Сурлагын чанарын гэнэтийн ахицынхаа ачаар 1945 оноос эхлэн Карнегийн Техникийн их сургуульд тэтгэлэгтэй суралцах боломж олдсон бөгөөд ердөө гуравхан жилийн дотор бакалавр, магистрын зэргийг хамгаалж чадсан юм. Энгийн хүний долоон жилийн хөдөлмөрийг гурван жилд нугалж чадсан Нэшийг Харвард, Чигако, Мичиган, Пристон зэрэг математикаараа тэргүүлэгч сургуулиуд аспирантураар элсүүлэн авах гэж уралдсаны эцэст Неш Принстоныг сонгожээ. Карнегийн их сургуулийн багш нь түүнийг итгэмжилсэн захидалдаа “Энэ хүн бол суут ухаантан” хэмээн ганцхан мөр бичиж байв.Принстоны их сургуулийг сонгосон шалтгаанаа Нэш “Илүү өндөр степентэй байсан” хэмээн тайлбарласан бөгөөд хичээлдээ бараг суудаггүй, ном уншдаггүй өдөржин ганцаараа суудаг байв. Үүнийгээ “Хичээлд суух хэн нэгний үзэл шингэсэн ном унших нь өөрийнх нь хувийн “Idea” буюу Санааг үгүй хийнэ” гэж тайлбарлажээ. Неш докторын диссертациа “Хамтын бус тоглоом” сэдвээр жил долоон сарын дотор бичиж дуусгасан ба энэ нь хожим “Нешийн тэнцвэр” онол хэмээн нэрлэгдэж, Харилцааны тоглоомын онолын эх болсон ба, Нобелийн шагнал авчирсан юм.

“Нешийн тэнцвэр” онол

Тоглоомын онолыг товчоор тайлбарлавал нийгэм, эдийн засгийн харилцааны үед гарах зөрчил болон хамтын ажиллагааг судалж, тайлбарлах бололцоог олгосон аналитик арга хэрэгсэл юм. Тэрээр өөрийн онолоо бааранд бүсгүйчүүдтэй танилцах оролдлого дээр жишээ аван тайлбарладаг байна

“Найзуудтайгаа суух хөөрхөн бүсгүйтэй залуу бүр танилцах гээд очвол бүгд бие биенийхээ урдуур ороод хэн нь ч амжилт олохгүй. Бүтэлгүйтсэн залуус дараа нь хөөрхөн бүсгүйн найзууд руу нь яриа өдлөө ч, ямар ч бүсгүй 2 дахь сонголт байхыг хүсэхгүй. Иймээс анхнаасаа хөөрхөн бүсгүй рүү зөвхөн нэг нь яваад, бусад нь түүний найзууд руу яриа өдсөн нь группийн хувьд хамгийн зөв тактик. Ингэснээр залуу бүр бүсгүйтэй танилцах боломж хамгийн өндөр болох ба энэ нь хөөрхөн бүсгүйн араас яваад огт хоосон үлдэхээс дээр сонголт болно. Өөрөөр хэлбэл болзох охинтой болохыг хүссэн залуус буюу тоглогчид энэхүү стратегийг сонгосноор Нешийн тэнцвэр үүсэх ба, энэ үед аль ч тоглогч өөр стратеги сонгох нь талуудад ашиггүй” байх аж.

Неш энэхүү онолын эхээ 1949 онд тавьсан ба 1959 он хүртэл АНУ-ын шинжлэх ухаан сонирхогчид даяар суут ухаан хэмээн хүндлэгдсэн маш амжилттай профессор байсан юм. Түүний багшлах хугацаандаа баталсан геометр, математикийн шинэ бодомжуудыг дурдах нь илүүц биз.

Шизофрени өвчин, уналт ба сэргэлт

1959 онд буюу хоёрдахь эхнэр Алисия Лардетэй гэрлэн хүүгээ өлгийдөн авснаас хойш түүний өвчин сэдэрч эхэлсэн бөгөөд хачин авир гаргадаг болсон тухай ойр дотнынхон нь дурсжээ. Тэрээр хүмүүст, харийнхан над руу New York Times-р нууц мессеж илгээгээд байна хэмээн ярих болж, хичээлээ заахгүй хэдэн арван хоногоор алга болдог болсон. Түүнчлэн сургуулийн кампус дотор улаан зангиатай улсын нууц коммунист бүлэглэлийн хүмүүс ирчихээд өөрийнх нь нэр төр, карьерыг сүйрүүлэх гээд байна хэмээн ярих болжээ. Удалгүй түүнийг багшлах боломжгүй гэж үзэн ажлаас нь чөлөөлжээ.

Эхнэр Алисия нь түүний өвчийг эдгээхээр тасралтгүй оролдсон ч байдал улам хүндэрсээр байсан учир аргагүйн эрхэнд түүнийг сэтгэц мэдрэлийн эмнэлэгт хүргэсэн байна. Эмнэлэгт түүнд маш эрсдэлтэй, эмийн болон цахилгаан эмчилгээ хийсэн бөгөөд эмнэлгээс гарах үед түүнийг аймшигтай харагдаж байсан хэмээн Алисая дурссан байдаг. 1962 онд Алисия гэр бүлээ цуцлахаар шийдсэн бөгөөд хүүгээ ганцаар өсгөхөөр болсон байв. Энэ хугацаанд Нешийн бие улам муудсаар байсан ба Принстоны их сургуульд багшилж байсан ч оюутнууд нь түүнийг энд тэндгүй хачин томьёо сараачиж явдаг хий үзэгдэл хэмээн хочилдог байв. 1970 онд Алисия Неш нар дахин хамтран амьдарч эхэлсэн ба түүний бие эрс сайжирсаар 1980 онд түүний өвчин сэдрэхээ больсон байв. Үүнийгээ тэрээр шизофрени өвчин нь эдгээгүй, зүгээр л тоохоо больчихсон юм “Бүтэшгүй, ер бусын зүйл шиг санагдсан бүх зүйлд боломж бий” хэмээн тайлбарласан аж.

Тэрээр насан туршдаа сэтгэцийн эмчийг үзэн ядсан бөгөөд “ Өвчнөө эдгээхийг хүсвэл өөрөөсөө өөр хэнд ч бүү найд. Сэтгэцийн эмч нар таныг зүгээр л мөнгө олох хэрэгсэл нь гэж боддог” хэмээн өгүүлж байв.

1994 онд тэрээр Нобелийн эдийн засгийн ухааны шагналыг Рейнхард Сэлтен , Харсаньй Жон нартай хуваан хүртсэн юм.

2015 онд Нэш 86 насандаа эхнэр Алисиянхаа хамт автомашины осолд орж хорвоог орхисон юм.

Кино найруулагч Рон Хорвард 2001 онд түүний амьдралаас сэдэвлэсэн “Beautiful Mind” уран сайхны киног бүтээж байв. Тус кино Окскарын наадмаас шилдэг найруулагч тэргүүтэй дөрвөн шагнал хүртэж байв.

Эх сурвалж: Biography.com, nobelprize.org

Google-ын үүсгэн байгуулагч Ларри Пэйжийн амжилтын түүх | Tech-News.mn

admin — Thu, 06 May 2021 12:44:14 +0000

Хэр олон хүн 20-иод насандаа дэлхийг өөрчилж чадах бол? Тийм ч олон биш л болов уу. Тэгвэл 20-иод насандаа дэлхий ертөнцийг үүрд өөрчилсөн Ларри Пэйжийг онцолж байна. “Google”-ын үүсгэн байгуулагч Ларри Пэйж интернэт гэх зүйлийг тэс өөрөөр ашиглах боломжийг хүн төрөлхтөнд олгосон юм. Түүнээс өмнө хүн төрөлхтөн хэзээ ч мэдээллийг ийм хурдтай хүлээн авч, бусдад түгээх боломжгүй байсан билээ.

Ларри Пэйж 1973 оны гуравдугаар сарын 26-нд АНУ-ын Мичиган мужийн Зүүн Лансинг хотод төрсөн байна. Түүний эцэг эх нь хоёул компьютерын технологитой холбоотой ажил эрхэлдэг байжээ. Түүний аав Карл Виктор Пэйж нь Мичиганы их сургуулийн компьютерын шинжлэх ухааны профессор аж. Олон хүн түүний аавыг компьютерын шинжлэх ухааны партизан гэж тооцдог бөгөөд хиймэл оюун ухааны салбарт асар том ахиц гаргасан хүн юм. Харин ээж нь Еврей гаралтай Глори Пэйж гэх эмэгтэй бөгөөд Мичиганы их сургууль болон Лэиман Бриггс Коллежид компьютер програмчлалын хичээл ордог байжээ.

Ларри Пэйжийн хүүхэд нас гэрт нь байх олон компьютеруудын эд анги, технологийн сэтгүүлүүдийн дунд өнгөрсөн юм. Тиймээс хүүхэд байхаасаа компьютертой нөхөрлөх болсон байна. Тэрээр дунд сургуульд байхаасаа эхлэн өндөр хурдны тооцоолох системийг сонирхож эхэлсэн аж.

Тэрээр Зүүн Лансингийн ахлах сургуулийг 1991 онд төгсөж Мичиганы их сургуульд компьютерын шинжлэх ухаан, инженерчлэлийн чиглэлээр суралцсан байна. Дараа нь Стамфордын их сургуульд мэргэжлээрээ докторын зэрэг хамгаалсан юм.

Өмнөх бүх технологийн салбарын тэрбумтнуудын адил тэрээр оюутан байхдаа өөрийн тэрбум долларын санааг олсон байна. Бүүр тодорхой хэлбэл 48,5 тэрбум ам.долларын санаа байсан юм. Анх “Google”-ын платформ нь түүний төгсөлтийн ажил байсан аж.

Дараа нь өөрийн дотнын найз Сергей Брины хамт “Google”-ыг эхлүүлэх ажилдаа орсон байна. Тэд анх ирээдүйн хамгийн агуу хайлтын системийг “BackRub” гэж нэрлэж байжээ. Энэ нь одоогийн “Google”-ээс өөрцгүй маш хүчирхэг систем байсан бөгөөд одоо хэрнэ “Google”-ын ихэнх алгоритмууд “BackRub” дээр суурилсан байдаг аж. Үндсэндээ “BackRub” нь вебсайтууд холбоосоор дамжин нэг нэгэндээ хэрхэн холбогдож байгаад дүн шинжилгээ хийх зориулалттай компьютерын томьёолол аж. Харин “Google” нь илүү нарийвчлалтай дүн шинжилгээ хийдэг томьёолол юм.

Тэд чухам яг юу хийж байгаагаа ухаарч энэ зүйлээ амжилтад хүрэх боломжтой болохыг ойлгомогцоо Ларри Пэйжийн дотуур байран дахь өрөөг өөрсдийн лаборатори болгон ашиглахаар шийдсэн байна. Тэд өрөөний голд Лего эвлүүлдэг тоглоомоор хана босгож тус тусдаа илүү шаргуу ажиллаж эхэлсэн аж.

Google-ийн анхны оффис

“Google”–ын хамгийн анхны хувилбарыг 1996 онд Стамфордын их сургуулийн сүлжээнд суурилуулан бий болгожээ. Анхны домэйн нэр нь google.stanford.edu байсан аж. Ингээд 1997 оны есдүгээр сард өөрийн домэйн нэр болох өнөөгийн google.com-ийг худалдан авсан байна. Үүнээс нэг жилийн дараа өөрсдийн компаниа байгуулж анхны оффисоо Мэнло дахь нэгэн найзынхаа гаражд нээсэн аж. “Google” гэдэг нэрний санааг “Googol” гэх үгийн үсгийг өөрчлөн бий болгосон аж. “Googol” гэдэг нь арвын зуун зэрэгтэй тэнцүү тоог илэрхийлдэг утгатай үг юм.

Ямарч хөрөнгөгүй тэдний компанийн өрсөлдөх чадвар, цаашид оршин тогтнох эсэх нь зөвхөн Ларри Пэйж болон Сергей Брин нарын оюун ухаанаас л хамаарч байсан юм. Харахад энгийн, хэрэглэхэд хялбар вебсайтыг Ларри Пэйж өөрийн “HTML”-ын анхан шатны мэдлэгийг ашиглан бүтээсэн байна. Учир нь тэдэнд веб хөгжүүлэгч цалинжуулах мөнгө байгаагүй юм. Ларри Пэйж “Google”-ын серверүүдийг илүү үр бүтээмжтэй ажиллуулахад түлхүү анхааран ажилладаг байжээ. Энэ нь “Google”-ыг маш хурдан болгосон юм. Ингэснээр хэрэглэгчид хайлтыг хурдтай хэрнээ үр дүнтэй хийх боломжтой болсон аж. Хоёр мянган он гэхэд “Google” нэг тэрбум орчим холбоосыг өөртөө багтаасан байна. Энэ амжилт нь тэднийг бүх цаг үеийн хамгийн хурдан хайлтын систем болгоод зогсохгүй бүх цаг үеийн хамгийн цогц, дэлгэрэнгүй хайлтын систем болгосон юм.

Компаниа байгуулснаас хойш хэдхэн жилийн дотор анхны хөрөнгө оруулагчдаасаа ихээхэн хэмжээний хөрөнгө босгосноор оффисоо уулан дээрх цогцолбор болгон өргөжүүлж нүүсэн байна. Энэ үеэс Ларри Пэйж “Google”-ын гүйцэтгэх захирлын албыг хаших болсон юм. Харин Сергей Брин компанийн ерөнхийлөгчийн үүргийг гүйцэтгэх болсон байна. Компани маш хурдацтай буюу түүхэнд байгаагүй хамгийн хурднаар өргөжиж байсны зэрэгцээ хайлтын системийн аюулгүй байдлыг алдагдуулахгүй байх хариуцлагатай ажил давхар тулгарсан юм. Тиймээс тэд 2004 онд хөрөнгийн бирж дээр өөрсдийн анхны IPO-г гаргасан байна.

Хамтрагч Сергей Бриний хамт

Компани олон нийтэд нээлттэй болсны дараа Ларри Пэйж, Сергей Брин болон төлөөлөн удирдах зөвлөлийн тэргүүн Эрик Шмит нар ахин 20 жил үргэлжлүүлэн хамтран ажиллах гэрээнд гарын үсэг зурсан аж. Хамгийн сонирхолтой нь тэд 2024 оны наймдугаар сарын 19-ны өглөө яг 09.30 цагт тус тусдаа хувийн арлууд дээрээ алчуур шидэн тэтгэвэртэй гарахаар тохиролцсон байна. Технологийн компаниудын удирдлагууд хувь эзэмших асуудлаас болж хоорондоо санал зөрөлдөн шүүхэд хандан, тэр нь компанийн нэр хүндийг унагаж байсан түүх олон байдаг билээ. Тиймээс тэдний энэ үйлдэл нь компанийн ирээдүйд хийсэн хамгийн эерэг шийдвэр гэж Ларри Пэйж тодорхойлдог байна.

Тэрээр “Хэрвээ бид мөнгөний төлөө энэ ажлыг хийдэг байсан бол аль эрт компаниа зараад хувийн арал дээр амарч байх байлаа” гэж хэлсэн байдаг.

Гэсэн хэдий ч Ларри Пэйж 2015 оны наймдугаар сарын 10-нд “Alphabet” гэх “Google”-ын толгой компанийг үүсгэн байгуулж байгаагаа зарлаж өөрөө гүйцэтгэх захирлын албыг хашихаа мэдэгдсэн юм. Харин Сергей Брин ерөнхийлөгчийн үүргийг гүйцэтгэдэг аж. Тус шинэ компани нь “Google”-ын менежментийг хийж байх бөгөөд “Google”-ын бусад салбарууд болох “Waymo”, “Verily”, “Sidewalk Labs”, болон “Google Fiber” зэргийг эзэмшдэг байна. Өнөөдрийн байдлаар “Alphabet” нь дэлхийн хамгийн өндөр үнэлгээтэй компаниудын гуравдугаар байрт 120,9 тэрбум ам.долларын хөрөнгөөр бичигддэг аж.

Ларри Пэйжийн удирдах арга барилыг маш хатуу гэж хамтран ажиллагчид нь дүгнэдэг. Тэрээр мэтгэлцээн хийх маш дуртай бөгөөд түүний дэвшүүлсэн аливаа санаа ихэвчлэн ажилчдынх нь дунд ширүүн маргаан өрнүүлдэг байна. Компанийн нөгөө тэргүүн Сергей Бринтэй хийдэг нөхөрлөлийг нь маргаан дээр суурилдаг гэж хэлж болох аж. Учир нь тэд ихэвчлэн муудалцаж бие биенээ доромжилдог байна. Ажилчдынх нь дэвшүүлсэн санаа түүнд таалагдахгүй бол шууд л тэнэг санаа гэж хэлдэг аж. Мөн ажилчид илтгэл тавих үеэр чангаар тоо тоолж уйтгартай байгааг нь сануулдаг байна. Гэхдээ тэрээр энэхүү хуучинсаг арга барилаа “хатуу хайр” гэж тодорхойлдог байна.

“Хүмүүс Google-ыг гайхалтай гэж боддог байж болно. Гэхдээ миний хувьд Google аймшигтай их дутагдалтай хэвээрээ л байна” Ларри Пэйж

Тэрээр хүсэл эрмэлзэлтэй, бүтээлч сэтгэлгээтэй хүмүүсийг юу юунаас илүү үнэлдэг аж. Түүний хувьд ажилчид нь өөрсдийн оногдсон ажлаа сайн хийх нь хоёр дахь асуудал байдаг байна. Учир нь тэр үргэлж шинэ санааг хүсдэг аж. Нэгэн “Google”-д ажиллаж байсан хүний нөөцийн ажилтан хэлэхдээ “Ларри Пэйж нэг удаа ажил тарсны дараа оффисын үйлчлэгчтэй нэлээн удаан хугацаанд хэрхэн хогийн савнуудыг ажилчдад илүү хүртээмжтэй байрлуулах талаар ярилцаж байсныг нь санаж байна” гэж байжээ.

Ларри Пэйжийн хувийн амьдралын хувьд тэрээр 2007 онд Лусинда Соутвүрт гэх эрдэмтэн бүсгүйтэй Карибын тэнгис дэх хувийн арал дээр гэрлэсэн аж. Тэд 2009, 2011 онуудад хоёр хүүхэдтэй болсон бөгөөд олон нийтээс хүүхдүүдээ маш их нууцалдаг. Ойр дотнын хүмүүсээс бусад нь тэдний хүүхдүүдийн нэрийг нь ч мэдэхгүй юм.

Тэрээр ер нь л маш нууцлаг амьдралтай нэгэн юм. Хүмүүс түүнийг нэг юмаа давтаж ярьдаг эмгэгтэйгээс өөрөөр нээх их мэдэхгүй билээ. Ларри Пэйж Хашимотогийн Тиозитоцит буюу нэг зүйлээ давтаж ярьдаг эмгэгтэй хүмүүст зориулж маш их мөнгийг хандивладаг билээ. Мөн 2014 онд Эбола вирустэй тэмцэхэд их хэмжээний хөрөнгө хандивлаж байжээ.

“Заримдаа хоосон мөрөөдөж зүүдлэхээ болиод сэрэх хэрэгтэй. Гэхдээ үнэхээр сайхан зүүд бол тэр мөрөөдлөө шүүрэн авах хэрэгтэй” Ларри Пэйж

Эх сурвалж: Alphabet Inc