Учир нь ERP системтэй холбоотой асуудал байгууллагын бүхий л чухал процесст нөлөөлж байдаг.
Том корпораци, компаниуд ERP систем нэвтрүүлэхдээ бүтэлгүйтэж байсан түүх цөөнгүй.
Ийнхүү ERP систем нэвтрүүлэх төслийн үед гардаг түгээмэл алдаануудаас зайлсхийх зөвлөмжийг хүргэж байна.  
Алдаа 1. Оновчгүй систем сонгох

Байгууллагууд санхүү, худалдан авалт болон хүний нөөцийн удирдлагын систем сэтгэл ханамжгүй болох үедээ цогц ERP систем сонгож асуудлаа шийдвэрлэх хандлагатай.
ERP систем нэвтрүүлэх шийдвэр гаргалт нь голдуу хөнгөн хийсвэр, демо ажиллуулж үзээд дурлачихдаг, бусад байгууллагын амжилттай нэвтрүүлсэн туршлагаар бүх асуудлыг тань шийдэж өгнө гэдэгт итгэчихдэг.
Шинэ систем сонгохын өмнө тухайн системийн давуу талуудыг судлаж, байгууллагын тань онцлогт тохирох эсэхийг судлаарай. Юун түрүүнд өөрийн байгууллагын хэрэгцээ шаардлагыг мэргэжлийн түвшинд тодорхойлж, түүнийхээ дагуу ERP системүүдийг үнэлэн сонгох нь хамгийн зөв арга юм.

Алдаа 2. Төслийнхөө амжилтыг хэмжиж чаддаггүй

Байгууллагууд ERP систем нэвтрүүлэх явцад үндсэн хэрэгцээг хангах зорилгуудыг оновчтой тодорхойлоогүй байдаг. Мөн төслийн цар хүрээ, санхүүгийн шаардлага ч тодорхойгүй байдаг.
Шинэ систем нэвтрүүлэхийн өмнө төслийн зорилго, төсөлд шаардлагатай цаг хугацаа, нөөц, төслийн гүйцэтгэлийг хэмжих түлхүүр үзүүлэлтүүдийг тодорхойлсон байх шаардлагатай.

Алдаа 3. Буруу төлөвлөлт

ERP систем нэвтрүүлэх ихэнх төслүүд буруу төлөвлөлтөөс болж бүтэлгүйтдэг. Буруу төлөвлөлт нь зарцуулагдах цаг хугацааг хэт өөдрөгөөр тооцох, бизнес процессын дахин инженерчлэл, байгууллагын өөрчлөлтийн удирдлагыг дутуу тооцоолсон, ур чадвар дутагдсан байдлаас хамаардаг.
ERP систем нэвтрүүлэх төлөвлөгөөг гаргах үйл явц нь байгууллага өндөр түвшний стратеги төлөвлөлт хийж байгаатай нэгэн адил юм. Төслийн төлөвлөгөөний үе шат бүр байгууллагын алба хэлтсүүд, багуудын үйл ажиллагаанд нөлөөлж байдаг. Мөн гарч болзошгүй асуудлуудыг тодорхойлж, эрсдлээс сэргийлэх төлөвлөлтийг хийх хэрэгтэй.

Алдаа 4. Нөөцийн дутагдал

Хамгийн чадварлаг ажилтанд ERP төслөө хариуцуулах ёстой гэж үзэх нь эрсдэлтэй. Учир нь ажилтан энэхүү төсөлд ажлын тодорхой хугацааг зарцуулдаг тул анхаарал төвлөрөл сарниж, чухал даалгаврууд дээр ажиллах цаг хугацаа багасч, төслийн ажлууд хугацаандаа дуусахгүй хойшлох шаардлага гардаг.
Тиймээс нөөцийг оновчтой хуваарилах нь хамгийн чухал. Хүчирхэг төслийн багийг бүрдүүлэх нь ERP нэвтрүүлэх төслийн бүтэлгүйтэх эрсдлийг бууруулна. Мэргэжлийн зөвлөх үйлчилгээ, аутсорсинг авах түгээмэл жишиг ч байдаг.

Алдаа 5. Хэт их өөрчлөлт

ERP системд хэт их өөрчлөлтүүд хийх, шинэ шинэ модулиуд хөгжүүлэх нь төслийн цар хүрээг өргөжүүлж, системийг түвэгтэй болгодог. Өөрчлөлт хийх нь буруу биш гэхдээ тохирсон хэмжээнд барих нь чухал.
Төслийн менежер төслийн цар хүрээ, бизнесийн хэрэгцээ, шаардлага, системийн чадавх, нөөцийн хуваарилалт зэрэг олон нөхцөлүүдийг тооцоолж системд шинэ модуль нэмэх, өөрчлөлт хийх шийдвэрийг гаргах нь зүйтэй.

Эх Сурвалж: MogulConsulting

Тэмдэгт, зураг, аудио, видео зэргийг компьютерт нэгтгэн зохион байгуулж цахим агуулга бүтээхийг мультимедиа гэнэ. Тэдгээрийг бий болгоход ашигладаг программ хангамжийг мультимедиа бүтээх хэрэгсэл гэнэ. Movie maker, Flash зэрэг төрөл бүрийн программууд ашиглан мультимедиа контент бүтээнэ.
Мультимедиа технологийн жишээнүүдэд видео подкаст, аудио слайдууд, анимаци видео зэргийг дурдаж болно. Эдгээр нь ухаалаг гар утас, зөөврийн компьютер болон бусад төхөөрөмжүүдэд бичлэг хэлбэрээр хадгалагдсан байна. Аль эсвэл шууд стрим байдлаар цацагдаж болно.

Мультимедиа элементийн төрлүүд:

БИЧВЭР – Мультимедиа элементийн нэг төрөл нь бичвэр буюу текстэн агуулга.
ЗУРАГ – Мультимедиа элементэд зураг гол үүрэгтэй. Зургийн чанарыг дараах элементүүдээр тодорхойлно.
Зураг(Пиксель)- Зургийг бүрдүүлж байгаа хамгийн жижиг цэс бөгөөд зургийн чанарыг илэрхийлэх хамгийн бага нэгж. Пикселийн тоо их байх тусам мэдээллийн хэмжээ их болно.
Нарийвчлал- Пикселийн нягтаршлыг харуулдаг утга бөгөөд зургийн тод харагдах байдлыг хэмждэг хэмжүүр юм. Нэг инч (2.54 см)-д ногдох пикселийн тоогоор (PPI- пиксел/инч) илэрхийлдэнэ. Өндөр нарийвчлалтай зураг тод, бага нарийвчлалтай зураг бүдэг харагдана.
Өнгөний ялгарал- Өнгөний нягтаршлын өөрчлөлтийг илэрхийлэх бөгөөд зургийн тод харагдах дүрслэлийн хэмжүүр юм. Өндөр нягтаршилтай зураг тод харагддаг бол бага нягтаршилтай зураг бүдэг харагдана.

Зурган файлын форматууд:

• PSD (Photoshop Document) – Фотошоп программ дээр боловсруулсан файлын өргөтгөл. Хадгалах гэж байгаа зургийг бус тухайн зургийн давхарга, маск зэрэг элементүүдийг өөртөө агуулна.
• PDF (Portable Document Format) -Баримт, илтгэл, ном, сонинг бүрэн эхээр харуулах зориулалттай файлын формат.
• GIF (Graphic Interchange Format) – Олон зургуудыг ээлж дараалалтайгаар харуулах хөдөлгөөнт зураг.
• JPEG (Joint Photographic Experts Group) – Бага зай эзлэх зургийн формат.
• PNG (Portable Network Graphic) – GIF файл ба JPEG файлын форматын сайн талуудыг ашиглан бий болгосон вэбсайт хэрэглээний зургийн файл.

ӨНГӨ – Өнгө бол зургийн хамгийн чухал элемент. Өнгө нь нягтрал, гэрэлтэлт, ханалт гэсэн 3 үндсэн элементтэй. Эдгээр 3 элементийг тохируулснаар өнгөний нэгдмэл байдлыг бий болгох, нүдэнд туссан өнгийг илүү тод гаргах боломжтой. Нягтрал нь өнгөнүүдийн нэг нь нөгөөгөөс ялгарах байдал. Гэрэлтэлт нь тусаж байгаа гэрлийн цацрагийн их баг тодорхойлогдоно. Өнгөний гэрэлтэлт их байвал өнгө илүү цайвар, бага байвал бараандуу байна. Ханалт нь өнгөний хурц тод харагдах байдал.
АУДИО – Дуу авиа нь мультимедиа технологийн үндсэн элемент . Тухайн объектыг зөвхөн харах биш, сонсох боломжтой. Аудио нь MP3, WMA, WAVE, MIDI, RealAudio гэх мэт форматтай байна.
ВИДЕО– Дүрс, аудио, текст бичвэр, өнгө зэрэг бүхий л мультимедиа элементийг өөртөө агуулна. Видео элемент нь хамгийн сэтгэл татам агуулгад тооцогддог.

Видео файлуудын хамгийн түгээмэл формат нь MP4, MPEG, AVI, WMV байна.
–  MPEG-4 – Гар утас болон видео хурлын системд ашигладаг. Өгөгдлийг хэдэн КВ-аас хэдэн арван КВ (kilobyte) хүртэл хурдаар дамжуулах боломжтой.
–  AVI – Windows үйлдлийн системийн видео болон аудио файлын нийлмэл формат. AVI файл тоглуулахад видео болон аудио файлын шахалтын форматаас хамааран CODEC программ хангамжийг ашиглана.

ХӨДӨЛГӨӨН – Хөдөлгөөнт элементүүд нь вэбсайт болон мультимедиа программ дээр аль алинд нь түгээмэл. Вэбсайтад зориулсан хөдөлгөөнт элемент үүсгэдэг хэрэгсэл бол Adobe Flash.

МУЛЬТИМЕДИА ТЕХНОЛОГИЙН ХЭРЭГЛЭЭ

График боловсруулалт нь мультимедиаг дүрслэн харуулах хэрэглээний технологи юм. График боловсруулалт нь компьютер ашиглан зураг, видео үүсгэж, бодит мэдрэмжийг бий болгох дуу болон бусад эффектийг зохиомлоор нэмдэг. Үүнийг энтертайнмэнт зориулалтын тоглоом, төрөл бүрийн мэргэжлийн сургалтад ашиглана.

ГОЛ ТЕХНОЛОГИУД:

КОМПЬЮТЕР ГРАФИК – Компьютер ашиглан зураг, видео бичлэг үүсгэж, боловсруулдаг технологи. Компьютер график нь 2 болон 3 хэмжээст дүрслэлийг бий болгоно. Хоёр хэмжээст дүрслэлийг зураг зурах, фото зураг боловсруулахад ашигладаг бол гурван хэмжээст дүрслэлийг видео тоглоомд виртуал ертөнцийг бий болгох, ирээдүйн хот суурин газрын ландшафт загварчлал, CAD-д суурилсан аж үйлдвэрлэлийн зохиомж зэрэгт ашиглаж байна.

ВИРТУАЛ БОДИТ БАЙДАЛ (VR)– Компьютер графикийг дууны эффекттэй хослуулан бодит байдлын хиймэл мэдрэмж (виртуал бодит байдал) бий болгох технологи бөгөөд уг технологийг ашиглан бодит бус хийсвэр орчинд өнгөрсөн болон ирээдүйн ертөнцийг мэдрэх, турших боломжтой болсон.
ӨРГӨТГӨСӨН БОДИТ БАЙДАЛ (AR)– Энэ нь компьютер графикийн аргаар бий болгосон мэдээллийг бодит ертөнцөд нэмэх технологи юм. Бодит ландшафт дээр компьютер ашиглан боловсруулсан газрын зургийг давхарлаж харуулах зэргээр бодит ертөнцийг өргөжүүлэх боломжтой.
КОМПЬЮТЕРЫН СИМУЛЯЦИ– Компьютер ашиглан дурын үзэгдлийн симуляци хийхийг хэлнэ. Төрөл бүрийн зохиомол нөхцөлөөр онол болон туршилтаар гаргах боломжгүй үр дүнг гаргана. Жишээ нь: Дэлхийн дулаарлын нөлөөлөлд үндэслэн цаг агаарын урьдчилсан мэдээ гаргах, барилга байгууламжид гал гаргах гамшгийн нөхцөл байдлыг турших зэрэг. Компьютерын симуляцид ашигладаг техник болон программ хангамжийг “симулятор” гэнэ.
МУЛЬТИМЕДИА БҮТЭЭХ (AUTHORING)– Мультимедиа бүтээх технологийг ашиглан өөрийн дуртай дуунуудыг нэгтгэн дууны цуглуулга, зургийг аудио болон бусад зүйлтэй хослуулан өвөрмөц видео хийж болно.

Мэдээллийг хадгалах, боловсруулах технологийн үйл явц дээр тулгуурлан мэдээллийн технологийн хөгжлийг дөрвөн үе шатад хуваарилдаг. Үүнд: Механикаас өмнөх (МЭӨ 3000-МЭ 1450), Механик (1450-1840), Электромеханик (1840-1940), Электрон (1940-одоог хүртэл).

МЭДЭЭЛЛИЙН ТЕХНОЛОГИЙН ДЭД БҮТЭЦ

Мэдээллийн технологийн дэд бүтцийн зорилго нь өгөгдөл, программ хангамж, компьютер болон сүлжээний тоног төхөөрөмжийн аюулгүй байдлыг хангах, мэдээллийн аюулгүй байдалд эрсдэл үүсэхээс сэргийлэх, өгөгдөл, мэдээлэлд дүн шинжилгээ хийх бүхий л үйл ажиллагааг удирдах юм.

Мэдээллийн технологийн дэд бүтэц:
– Байгууллагын үндсэн систем – Хэрэглэгчийн бүртгэлийн систем, байгууллага доторх болон байгууллага хоорондын мэдээлэл солилцох систем, төлбөр тооцооны систем зэрэг хамаарна.
– Байгууллагын өгөгдлийн сан- Өгөгдлийн сангийн дахин төлөвлөлт, нэгтгэл, шилжүүлэг болон хяналтын үйл ажиллагаа хамаарна.

Мэдээллийн технологийн үндсэн салбаруудыг дурдвал:

– Мэдээллийн технологийн бизнес ба менежмент (IT entrepreneurship & management)
– Цахим аюулгүй байдал (Cybersecurity & Forensics)
– Өгөгдлийн удирдлага, дүн шинжилгээ (Data management & Analytics)
– Тоон систем ба эмбедед систем (Digital Technology & Embedded systems)
– Сүлжээ ба мэдээлэл харилцаа холбоо (Networking, Information & Communications Technology)
– Программ хангамж хөгжүүлэлт (Software development)
– Системийн администратор (System administration)
– Системийн анализ (System analysis)
– Веб болон аппликэйшн хөгжүүлэлт (Web design & Application development)

МЭДЭЭЛЭЛ ТЕХНОЛОГИЙН ЧАДВАРУУД
Мэдээллийн технологийн салбарт шаардагдаж байгаа үндсэн ур чадварууд:
– Интернэт орчинд ажиллах
– Компьютер дээр ажиллах
– Төрөл бүрийн мэдээлэл холбооны төхөөрөмж ашиглах
– Сүлжээний нууцлал буюу аюулгүй байдлыг хангах
– Хэрэглээний программ хангамж ашиглан, контент бэлтгэх
– Үйлдлийн систем дээр ажиллах
– Өгөгдөлд дүн шинжилгээ хийх, боловсруулах
– Программчлалын хэл бичих
– Вэбсайт, аппликэйшн зохиох
– Хэлний ур чадвар

МЭДЭЭЛЛИЙН ТЕХНОЛОГИЙН НИЙТЛЭГ ҮГ ХЭЛЛЭГ:

Мэдээлэл холбооны технологи (ICT – Information & Communication Technology) – Мэдээлэл харилцаа холбооны хэрэгслийг ашиглан мэдээлэл хүлээж авах, түгээх, боловсруулах, хадгалах, дамжуулах зэрэг бүхий л үйл ажиллагааг хамарсан нэгдмэл ойлголт.
Мэдээлэл холбооны төхөөрөмж – Компьютер болон бусад дагалдах төхөөрөмжүүд, дэвшилтэт техник болон технологийн хэрэгслүүдийг (дижитал камер, дрон, проектор гэх мэт) хамруулан ойлгоно.

Дижитал эринд веб сайт бол таны номер нэг маркетингийн хөрөнгө юм.

Америкчууд долоо хоногт дунджаар 23.6 цагийг онлайн орчинд өнгөрөөдөг бөгөөд өдөрт таван хүртэлх цагыг нь хөдөлгөөнт төхөөрөмж дээрээ ашигладаг байна. Мөн хүмүүс ямар нэгэн байгууллагын хэрэглэгч болохоосоо өмнө тухайн байгууллага (компани)-ийн веб сайттай танилцаж, тухайн бизнест нь итгэх итгэлийг олж авдаг байна.

ШАЛТГААН # 2: Хүмүүс таныг онлайнаар хайж байна …

Нийт хэрэглэгчдийн 97% нь өөрт хэрэгтэй, шаардлагатай байгаа зүйлээ онлайнаар хайдаг.

Олон компаниуд хайлтын системийн оновчлол (SEO)-ыг хийж, веб сайтдаа хөрөнгө оруулалт хийх нэг шалтгаан бий. Нийт хэрэглэгчдийн 97% нь бизнесийн үйл ажиллагааг онлайнаар хайдаг бөгөөд хайлтын дээгүүр илэрц нь хайлтын системийн оновчлолоос 93% нь хамаардаг байна. Өдөрт Google дээр 3,5 тэрбум хайлт хийгддэг бөгөөд яг энэ мөчид таны санал болгож буй үйлчилгээг ч мөн хайж байгаа. Таны гарт маш том боломж бий.

ШАЛТГААН # 3: Веб сайт нь таныг хэрэглэгчтэй холбох ГҮҮР

Хэрэглэгчид онайнаар бизнес эрхлэгчдийг олж судлан, хамтран ажилсаар байна.

АНУ-ын Дижитал хэрэглэгчдийн судалгаа-нд дурдсанаар хэрэглэгчдийн 63% нь тухайн компанийг үйл ажиллагааны чиглэлээр нь веб сайтаар дамжуулан холбогдож, бизнесийн хамтын ажиллагаагаа эхэлдэг байна. Үүнийг та онлайн дахь хайлтын системтэй хослуулан ашигласнаар таны бизнест эерэг үр дагаварыг авчрах болно. Мөн өөр нэгэн судалгаагаар хэрэглэгчид худалдан авалт хийх шийдвэрийг гаргахын өмнө дунджаар гурван эх сурвалжийг ашигладаг бөгөөд веб сайт нь таныг, таны бизнесийг хэрэглэгчтэй холбох томоохон гарц, гүүр юм.

ШАЛТГААН # 4: Худалдаа наймаа, аж үйлдвэрлэл зэрэг бизнесээс бизнес руу чиглэсэн үйл ажиллагаанд веб сайтын контент маш чухал

Бизнесээс бизнес руу чиглэсэн үйл ажиллагаатай компанийн худалдан авагчдын 75% нь веб сайтын агуулга нь худалдан авах шийдвэрт ихээхэн нөлөөлдөг гэж мэдэгдсэн бол 62% нь веб сайтын контент дээр тулгуурлан шууд худалдан авах сонголтыг хийдэг байна.

Бизнесээс бизнест чиглэсэн үйл ажиллагаатай компанийн дундаж худалдан авагч веб сайттай танилцаж, харилцахаас өмнө дунджаар 12 хайлт хийдэг бөгөөд тэд борлуулалтын төлөөлөгчтэй ярихаасаа өмнө худалдан авалтын 57%-ийг хийсэн байдаг. Үүгээр ч зогсохгүй бизнесээс бизнест чиглэсэн үйл ажиллагаатай компанийн хэрэглэгчдийн тал хувь нь веб сайтыг хэрэгцээтэй суваг гэж үздэг бөгөөд гуравны нэгээс илүү хувь нь веб сайт нь хамгийн их хэрэгцээтэй суваг болно гэж үзэж байна.

ТА ОФФИСГҮЙ БАЙЖ БОЛНО, ХАРИН ВЕБ САЙТГҮЙ БАЙЖ БОЛОХГҮЙ

ШАЛТГААН # 5: Веб сайтын дизайн нь компанийн нэр хүндийн илэрхийлэл.

Веб сайтгүй байх нь хэрэглэгчид танд итгэх итгэлийг бага болгодог. Нийт хэрэглэгчдийн 75% нь веб сайтын дизайнд тулгуурлан таны бизнес болон компанид дүгнэлт хийдэг байна. Хүмүүс өөрсдийн итгэдэг компанитай хамтран бизнес эрхлэх нь гарцаагүй бөгөөд веб сайт нь тэднийг илтгэх итгэмжлэл, шагнал авахаар очдог газар юм.

Веб сайт нь зочиддоо маш өндөр сэтгэгдэл үлдээж, тухайн компанийн нүүр царайг илтгэдэг учраас энэ нь маш чухал асуудал юм.

ШАЛТГААН # 6: Хүссэн хариултыг нь богионо хугацаанд өгөх хэрэгтэй.

Хүмүүс ямар нэг зүйлийг мэдэхийг хүсч, ямар нэг зүйл хийхийг хүсч байвал таны веб сайтаар зочилдог. Мөн тэр даруйдаа өндөр сэтгэл ханамжийг таны веб сайтаас хүлээх болно.

Веб сайтад зочилсон хүмүүс дараах асуултуудад маш богино хугацаанд хариулт авахыг хүсдэг.

Чи хэн бэ?
Та юу хийдэг / санал болгодог вэ?
Би тантай хэрхэн холбоо барих вэ?

ШАЛТГААН # 7: Таныг салбартаа тэргүүлэгч байр суурь эзлэхэд тань туслана

Вэб сайттай болох нь таны бизнесийн үйл ажиллагааны цар хүрээ болоод нэр хүнд зэрэгт шууд нөлөөлдөг бөгөөд хэрэглэгчидэд өөрийгөө таниулж, ажиллаж буй салбартаа тэргүүлэгч болох боломжийг маш хурдацтайгаар ахиулж өгдөг.

ШАЛТГААН # 8: Social media таныг бүрэн илэрхийлж чадахгүй.

Фэйсбүүк хуудастай байсан ч танд вэбсайт хэрэгтэй.

Яагаад гэж үү? Дэлхий дээрх томоохон платформуудыг ашиглан өөрийн бизнес орчинг үүсгэх боломжтой хэдий ч тэдгээрийн хувьсан өөрчлөгдөж буй алгоритмын шинэчлэлт нь бизнес эрхлэгчдэд хэрэглэгчидтэйгээ холбогдоход улам хүндрэлтэй болж байна.

Запас и-мэйл хаяг ашиглах

Та ямар нэгэн сайтад и-мэйл хаягаа өгөх шаардлага гарсан тохиолдолд байнга ашигладаг хувийн хаягаа өгөхийн оронд, TempMail гэх мэт сайтуудаас түр зуурын, ашиглаад хаях боломжтой түр хаяг нээж байнгын хаягаа аюулгүй байлгах боломжтой. Chrome болон Firefox-н Blur нэртэй plugin ашиглах нь таны хувийн и-мэйлийг хамгаалах үнэ төлбөргүй арга юм.

И-мэйлийн шүүлтүүрийг тохируулах

Ямар и-мэйлийн үйлчилгээ ашиглаж буйгаас тань хамаарч тодорхой гарчигтай эсхүл тодорхой хэрэглэгчээс ирсэн и-мэйлийг автоматаар шууд Junk folder эсвэл бүр устгах тохиргоо бүхий шүүлтүүр үүсгэх боломж ихэнх тохиолдолд байдаг. Спам и-мэйлүүдийг хэрхэн илүү сайн таньж, устгах тал дээр эдгээр шүүлтүүрүүдийг сургахын тулд ашигладаг и-мэйлийнхээ хэрэглэгчийн гарын авлагыг уншаарай. Түүнчлэн, хэрэв зарим нэг и-мэйлийг алдаатайгаар спам хэмээн тодорхойлж байвал и-мэйл үйлчилгээнийхээ тохиргоонд спам биш гэдгийг нь залруулан тодорхойлж өгөх хэрэгтэй.

Спам илгээж буй и-мэйл хаягуудыг блоклох

Энэ алхмыг хэрэгжүүлэхэд зарим тохиолдолд хүндрэлтэй байдаг. Учир нь спам и-мэйл илгээгчид нь ихэвчлэн хуурамч хаяг ашиглах ба илгээх бүртээ өөр өөр хаяг хэрэглэдэг тул тухайн хаягийг блоклоод ч спам ирсээр байх тохиолдол бий. Хэрэв нэг хаягнаас удаа дараа спам ирж байгаа бол үүнийг и-мэйл үйлчилгээнийхээ дотоод тохиргоогоор блоклох боломжтой ба ингэснээр уг спам таны inbox-т орж ирэхээс сэргийлэх болно.

Спам и-мэйлд хэзээ ч бүү хариул

Хэдийгээр хааяа ядаргаатай спам и-мэйлд ууртай хариу бичмээр, эсвэл тэднээс харилцагчийн жагсаалтаасаа таны и-мэйлийг хасахыг хүсмээр санагдавч, энэ ихэвчлэн эсрэг үр дагавар авчирдаг. Тэдэнд хариу бичсэнээр таныг уг и-мэйлээ идэвхтэйгээр ашигладаг болохыг илгээгч мэдэн, улам их спам илгээх шалтгаан болно.

Спам и-мэйлээс худалдан авалт хийх, линкээр нь орж хэрхэвч болохгүй.

Хэрэв танд ирсэн и-мэйл спам шиг харагдаж л байгаа бол, спам байх магадлал өндөр байдаг. Тиймээс и-мэйл хүлээн авахаас татгалзах буюу unsubscribe хийх линк байсан ч спам гэж сэжиглэсэн л бол уг и-мэйл доторх ямар нэгэн линк дээр дарах, аливаа худалдан авалт хийхгүй байх хэрэгтэй. Эс бөгөөс спам илгээгчдэд таны хувийн мэдээлэлд нэвтрэх боломж нээгдэх ба таны хаягийг мөн бусад спам илгээгч компаниудтай хуваалцан, танд илүү олон спам ирэх бас нэг шалтгаан болно.

Аль ч аргыг хэрэглээд амжилт олохгүй бол яах вэ?

Хэрэв таны inbox дахь спам и-мэйлийн тоо хяналтаас гарч, дээр дурдсан бүх арга хэмжээнүүд үр дүнд хүрээгүй бол шинэ и-мэйл хаяг авах талаар бодох цаг болсон байж магадгүй юм.

1. АЛБАН МАЙЛ

И-майл бичих соёл, стандарт, дүрэм гээд янз бүрээр хүмүүс ярьдаг. Албан бичиг бичих стандарттай байгууллага, компаниуд олон байдаг. Тэдгээрийн нийтлэг баримтлах зарчмын хувьд:

• Байгууллагын үндсэн брэндингийг илэрхийлнэ
• Гарчиг нь и-мэйл, захидлын гол санааг илэрхийлж байх
• Агуулгыг чухалчилна. Толгой, мөр, сүүл холбосон товч, ойлгомжтой.
• Бичвэрийн хувьд 3-4 мөр хэтрэхгүй, Олон фонт солихгүй
• Монгол болон бусад хэлээр хольж бичихгүй байх
• Мэндчилгээ
• Хавсралт файл хүргүүлж байгаа бол тайлбарыг дурдах
• Signature буюу гарын үсэг ашиглах
• И-мэйл захидлын төгсгөлд “Баярлалаа” “Хүндэтгэсэн ….” гээд өөрийн овог, нэр албан тушаал, холбоо барих мэдээлэл зэргийг заавал оруулах.

2. ҮСГИЙН ФОНТ

И-майл хэрэглээг дэмжих платформуудын хувьд хэрэглэгчдийг өөрсдөө фонтоо сонгох боломжийг өгдөг. Өөрөөр хэлбэл рс дээрээ тухайн фонтоор бичээд майл руугаа хуулах боломжтой. (Gmail-н хувьд 11 фонттой)

Албан майлын хувьд одоог хүртэл “Times New Roman” эсвэл “Arial” зэрэг сонгодог фонтыг ашигласаар байдаг. Зарим байгууллагуудын хувьд Tahoma, Cambria, Calibri, Verdana зэрэг фонтуудыг ашиглаж байдаг. Фонтын хэмжээний хувьд 11,12-тай байх. Хэт олон фонт, хэт олон фонтны хэлбэр (налуу, тод, доогуур зураастай гм), бүх текстийг томоор бичих зэргээс зайлсхийх хэрэгтэй.

3. SUBJECT БУЮУ И-МЭЙЛИЙН ГАРЧИГ ХЭСЭГ

Subject буюу Гарчиг маш чухал. Бид нарын дийлэнх нь өдөрт олон майл хүлээж авдаг. Бараг тухайн майлийг уншихгүй ч тохиолдол байдаг. Майл хүлээн авч байгаа хүн тухайн майлыг нээж үзэх, унших эсэхээ гарчигаас хамаарч шийдэх нь түгээмэл. Тиймээс гарчиг товч бөгөөд тодорхой, ойлгомжтой өгөх хэрэгтэй. Жиш: И-майл маркетингийн компанит ажлын гол амин сүнс нь майлын гарчигт байдаг.

Муу гарчгийн жишээ гэвэл

• Сайн байна уу?, Hello, Hi гэх мэт мэндчилгээгээр эхлэх аль эсвэл ойлгомжгүй нэг үг бичих
• Хэрэв та бизнес удирддаг, хөрөнгө оруулагч, эсвэл бизнесийн удирдлагад дундаас дээш түвшинд ажилладаг менежер гэх мэт хэт нуршуу, сунжирсан
• Дэлгэрэнгүйг майлын агуулгаас уншиж танилцана гэх мэт

Сайн гарчгийн жишээ гэвэл

• Хамтран ажиллах тухай гэх мэт товч бөгөөд тодорхой
• Сургалт эхлэхэд нэг хоног үлдлээ гэх мэт сэдэлжүүлсэн, өдөөсөн

4. REPLY TO ALL

Энэ товчлуурыг дарахын өмнө таны хариуг бүх хүн үзэх шаардлага бий эсэхийг бодож үзээрэй. Тусгайлан нэг л хүнд хариу явуулах товчлуур бас бий шүү дээ. Түүнчлэн өмнө нь харилцаж байсан хүн ч гэлээ, өөр асуудлаар холбогдох гэж байгаа бол Reply ашиглалгүй шинээр Subject үүсгэж бичээрэй.

5. ATTACHMENTS буюу ХАВСРАЛТ ФАЙЛ

Ямар нэг файл хавсаргахдаа түгээмэл хэрэглээний програмаар нээгдэх эсэхийг шалгаарай. Microsoft Office-ийн хэрэглүүрүүд бол хаана ч бий, харин Prezi ашигласан илтгэлийн файлыг тань бүх хүн нээж чадах нь эргэлзээтэй. Тийм болохоор и-мэйл явуулахын өмнө өөр өргөтгөл ашиглавал зүгээр эсэхийг лавлаад асуусан нь дээр.

6. И-МЭЙЛИЙН БҮТЭЦ

Хэдий байнгын харилцагч, найз нөхөр шиг тань хүн боловч ажил хэргийн и-мейл л бол эхэнд нь заавал мэнд мэдэж, дараачийн мөрнөөс ажил хэргээ бичих хэрэгтэй. Мөн и-мейлийн төгсгөлд баярлалаа, баяртайгаа бичиж нэрээ заавал хавсаргах нь зүйтэй.

7. ХАРИУ ИЛГЭЭХ

Ажлынхаа и-мэйлийг өглөө бүр шалгах нь таныг хэр сайн ажилтан бэ? гэдгийг илтгэнэ. Хэрэв хариу өгөхөд хэлэлцэх, бодох шаардлагатай бол ядаж хүлээж авлаа гээд хэзээ хариу өгөх боломжтойгоо даруй мэдэгдэх нь том соёл. Бэлэн болоогүй байсан гээд хүний и-мэйлийг гурав хоног уншилгүй дарж болохгүй шүү дээ. Ер нь технологи хөгжсөн энэ үед гар утсандаа и-мэйлээ холбож тухай бүрт даруй хариу өгч сурах нь сайн мэргэжилтний нэг чанар юм.

8. SIGNATURE 

Dear

Хүндэтгэсэн,

Батын ТУНГАЛАГ

Гүйцэтгэх Захирал
Соёмбо ХХК
Холбоо барих дугаар: 9999-9999
И-майл хаяг: tungalag@soyombo.mnВэб хаяг: www.soyombo.com

ЗӨВЛӨМЖ

• Албан майлд энгийн ярианы хэллэг болох Сайн уу, юу байна, Bye bye гэх мэт албан бус үг хэллэг ашиглах
• Үг, үсгийн алдаатай
• Латин, кирил үсэг холих
• Subject, Мэндчилгээ, Signature хэрэглэхгүй байх
• Албан ёсны и-мэйлд сэтгэл хөдлөлийн өнгө аяс илэрхийлсэн үг хэллэг бичихээс зайлсхийх
• Fwd:…….хийх
• Signature хэрэглэхгүй
• Subject Буюу гарчигчаа буруу өгөх
• Майл хүлээж авсан бол хүлээж авсан тухай мэдэгдэх

Бизнесүүдийн түгээмэл ашигладаг мэдээллийн системүүдийг дурдвал:

ПОС систем / POS

ПОС систем нь бараа бүтээгдэхүүн борлуулах үед борлуулалтын мэдээлэл (юуг, хэзээ, хаана, хэдий хэмжээгээр, хэнд худалдсан) -ийг цуглуулдаг систем юм. ПОС систем нь бар кодын хэрэглээг бүтээгдэхүүний удирдлагын стандарт болгодог. Уг системийг сүлжээ дэлгүүр, супермаркет, их дэлгүүр, зоогийн газар, худалдааны төвийн түгээлтийн мэдээллийн систем-д ашигладаг. Энэ системийн давуу тал нь борлуулалтын цуглуулсан мэдээлэлд үндэслэн маркетингийн судалгаа, борлуулалтын урьдчилсан таамаглалыг хийх боломжтой. Цуглуулсан мэдээллийг бүтээгдэхүүний хөгжүүлэлт, шинээр дэлгүүр нээх стратеги зэрэгт ашиглах, улирал, бүс нутаг, цаг хугацаанаас хамааруулан захиалгын тоо, бараа материалын хэмжээг тохируулахад ашигладаг. Тухайлбал, жижиглэн худалдааны байгууллага ийм мэдээллийг өөрийн брэндийн бүтээгдэхүүнийг хөгжүүлэхдээ ашигладаг.

IС карт

IC карт нь IC чип буюу хагас дамжуулагч интеграл бүхий хуванцар карт юм. Өгөгдлийг шифрлэх боломжтой тул ийм картыг хуурамчаар хялбар үйлдэх боломжгүй. Уламжлалт соронзон карттай харьцуулахад хадгалах мэдээллийн хэмжээ нь хэдэн арваас хэдэн зуу дахин их тул их хэмжээний мэдээлэл хадгалах боломжтой. IC карт нь соронзон картаас илүү боломжтой тул төрөл бүрийн салбарт өргөнөөр хэрэглэгддэг.
IC картын энгийн жишээ нь ATM-ын карт, санхүүгийн байууллагын зээлийн карт болно.

RFID (Radio Frequency Identification)

RFID нь хүн болон объектын мэдээллийг жижигхэн радио чип-ээр таних механизм юм. Радио чипийг шошго, дугтуй, түлхүүрийн оосор, бугуйн зүүлт зэрэгт суулган унших боломжтой учраас хүн болон объектод түүнийг ашиглахад хялбар. Үүнээс гадна RFID нь хэд хэдэн радио чипыг нэг зэрэг таних боломжтойгоороо онцлог. Энэ боломжийг ашиглан түлхүүрийн оосорт буй радио чипээр хүмүүсийн орох, гарах хөдөлгөөнийг удирдах эсвэл жимс ногоо, мах зэрэг бүтээгдэхүүний шошгод суурилуулсан дээрх радио чипээр түгээлтийн мэдээллийн түүхийг хянах зэргээр мөшгөх систем-д ашиглаж байна. Радио чипийг IС шошго эсвэл утасгүй IC карт гэж нэрлэдэг. Радио чип болон уншигч төхөөрөмжийн холбогдох боломжит зай нь хэдхэн сантиметрээс 2 метр хүртэл хэмжээтэй байдаг ба тэжээлээ антенаар дамжуулан авах боломжтой. Түүнчлэн IC картанд антенн суурилуулснаар зайнаас унших боломжийг бүрдүүлсэн учраас хүрэлцдэггүй хэлбэрийн IC карт нь RFID технологийн ангилалд багтдаг. IC картын түгээмэл жишээ нь цахим мөнгө, тээврийн хэрэгслийн тасалбар, жолооны үнэмлэх болно .

Цахим мөнгө

Цахим мөнгө нь бэлэн мөнгөөр урьдчилан цэнэглэсэн хүрэлцдэггүй төрлийн IC картаар бүтээгдэхүүний үнэ болон бусад төрлийн төлбөрийг жинхэнэ мөнгөтэй ижил байдлаар төлөх механизм юм. Сүүлийн үед ухаалаг утсанд суулгасан IC карт хэлбэрийн цахим мөнгийг түгээмэл ашигласаар байна. Хэдийгээр түүнийг ашиглах арга нь урьдчилсан төлбөрт карт, бэлгийн купонтой төстэй боловч, IС картын олон дахин цэнэглэх боломжтой байдаг нь байгаль орчинд ээлтэй давуу талыг бий болгож, хэрэглэгчдийн сонирхлыг өргөнөөр татаж байна. Нөгөөтээгүүр задгай мөнгө ашиглах шаардлагагүй учраас өндөр настай хүмүүс болон хөгжлийн бэрхшээлтэй иргэд хэрэглэхэд хялбар байдаг нь түүний бас нэг давуу тал юм.

Кредит карт

Кредит карт нь хэрэглэгч болон картын компани хооронд гэрээ байгуулан ашиглах карт юм. Хэрэглэгч ийм картыг бараа бүтээгдэхүүн, үйлчилгээ худалдан авахдаа (хүчин төгөлдөр хугацаа, ашиглах хязгаар зэрэг) тодорхой нөхцлийн дор ашиглах боломжтой зээлийн карт юм. Энэ төрлийн карт эзэмшигч нь кредит картын компаниас хэрэглэгчийн ашигласан мөнгөн дүнг нэхэмжилсний дараа төлбөрөө төлнө.
Төлбөрийг тухай бүр хийх шаардлагагүй учраас хэрэглэгч дансандаа үлдэгдэлгүй байсан ч худалдан авалт хийх боломжтой. Зээлийн төлбөрийг нэг удаа эсвэл хэд хэд хувааж төлөх боломж нь зээлийн картын давуу тал юм. Гэвч зээлийн хүүгийн төлөх дүн нь эргэн төлөлтийн хуваарилалтаас хамаарах тул хэрэглэгч өөрийн төлбөрийн чадвараас хэтрүүлэн хэрэглэх эрсдэлтэй байдаг. Тиймээс ийм картыг хянуур хэрэглэх шаардлагатай.

Дебит карт (J -Debit)

Дебит карт нь санхүүгийн байгууллагын бэлэн мөнгөний картаар бараа бүтээгдэхүүн худалдан авч болох карт юм . Энэ нь аливаа бүтээгдэхүүн худалдан авах үед дебит картыг ПОС терминалд уншуулж хэрэглэгч нууц кодоо оруулахад тэр даруйд банкны данснаас нь мөнгөн дүн татагдах механизм юм. Банкны дансны үлдэгдэл хүрэлцэхгүй тохиолдолд төлбөр хийгдэхгүй тул, дебит картыг эзэмшигч өөрийн төлбөрийн чадвараас хэтрүүлэн ашиглах боломжгүй юм . Төлбөрийн системйн хураамж бодогддоггүй нь энэ картын давуу тал боловч зээлийн карттай харьцуулахад ашиглах боломжтой газрууд цөөн, карт ашиглах хугацаа хязгаартай байдаг учраас дебит картыг ашиглах боломжтой эсэхийг нягталж үзэх шаардлагатай.

GPS систем

GPS систем нь хиймэл дагуул ашиглан байршлыг нарийн олж тогтоодог цахилгаан соронзон долгионыг хүлээн авах систем юм. Энэ нь АНУ-ын зэвсэгт хүчний боловсруулсан батлан хамгаалах технологи. GPS систем нь уртраг, өргөрөг, өндрийг тодорхойлох боломжтой ба хүлээн авагчийн байрлалыг сантиметрээс хэдэн арван метрийн нарийвчлалтай тогтооно. GPS системийг хүмүүс дангаар нь хэрэглэхээс гадна автомашины удирдлагын систем болон гар утсанд суурилуулан өргөнөөр ашигладаг.

Мэдээллийн хөрөнгийн голлох төрлүүд:

Үйлчлүүлэгчийн мэдээлэл

Ажил хэрэг хамтран эрхэлдэг үйлчлүүлэгчийн (компани, хувь хүн зэрэг ) мэдээлэл юм. Хүмүүсийн нэр, хаяг, утасны дугаар зэрэг мэдээллийг бусад хүн ашиглаж болно. Эдгээр мэдээлэл тухайн улсын хувийн мэдээллийг хамгаалах эрх зүйн бичиг баримтаар хамгаалагдаж байх ёстой байдаг учраас уг баримтад нийцүүлэн зүй зохистой удирдах шаардлагатай.

Борлуулалтын мэдээлэл

Зах зээл, үр ашгийн дүн шинжилгээ, бүтээгдэхүүн үйлдвэрлэх технологи, худалдан борлуулах аргачлал зэрэг борлуулалтын үйл ажиллагааны чухал мэдээлэл юм .

Оюуны өмчтэй холбоотой мэдээлэл

Зохиогчийн эрхээр хамгаалагдсан, үйлдвэрлэлийн өмчийн эрх бүхий мэдээлэл юм .

Хүний нөөцийн мэдээлэл

Албан хаагчийн нас, гэр бүлийн дэлгэрэнгүй мэдээлэл, цалин, албан тушаалын томилгоо, ажлын гүйцэтгэл зэрэг эрх бүхий этгээд ашиглаж болох ажилтнуудын хувийн мэдээлэл юм.

Дараа үеийн галт хана FortiGate NGFW гэж юу вэ?

Энэхүү шийдэл нь хоёрдугаар үеийн галт хана гэдгээрээ олонд танигдсан бөгөөд байгууллагын аюулгүй байдлыг ахисан түвшинд хамгаалдаг шийдэл юм. NGFW нь deep-packet inspection, intrusion prevention (IPS), ахисан түвшний malware хамгаалалт application control, болон сүлжээний урсгалыг бүхэлд нь хамгаалах г.м маш олон боломжуудтай юм.

Уламжлалт галт хана болон дараа үеийн галт хана (NGFW)-ийн ялгаа юу вэ?

Уламжлалт галт хана нь сүлжээнд нэвтрэх урсгалыг хянадаг бөгөөд зарим тохиолдолд сүлжээнээс гарах урсгалыг ч мөн адил хянадаг. Эдгээр төхөөрөмжүүд нь өгөгдөл дамжуулах эсвэл хориг тавих эсэхийг тодорхойлохын тулд пакет, сүлжээний хаяг, портуудыг хардаг. Хэрвээ энэхүү уламжлалт галт ханыг онгоцны буудалтай зүйрлэх юм бол ажиллагааны хувьд сүлжээний урсгалыг зөвхөн шалган тасалбартай эсэхийг шалгаад оруулдаг бөгөөд хэрвээ ямар нэг төрлийн халдлага маш эмх цэгцтэй орж ирвэл түүнийг ялгалгүй оруулах эрсдэлтэй байдаг. Үүнээс болж програмын урсгал зогсож, халдлага амжилттай болдог ба энэ нь халдлага үйлдэгчид маш овжиноор хортой kодыг нууж чадсанаас болдог.

Харин дараа үеийн галт хана (NGFW) нь хяналт ба халдлагаас урьдчилан сэргийлэх систем (IPS) гэх мэт шинэ функцуудын тусламжтайгаар сүлжээний урсгалыг сайтар ажиглан хортой програмыг олж хаах чадвартай болсон юм. Яг л өмнөх жишээн дээр дурдсан онгоцны буудлын шалган нэвтрүүлэх хэсэг дээр рентген аппарат нэмж байрлуулсантай адил юм.

Дараа үеийн галт ханыг сонгохын давуу тал юу вэ?

Мэдээллийн технологийн үсрэнгүй хөгжлийн улмаас өнөөгийн сүлжээний орчин урьд урьдынхаас илүү төвөгтэй болсон. Сүлжээний урсгал хязгааргүй болохын хэрээр түүний дотор байгаа хортой кодуудыг таньж, илрүүлэх нь улам хүнд болсоор байна. Тиймээс цаг үетэйгээр нийлэн шинэчлэлтүүдийг байнгын давтамжтай хийж байдаг сүүлийн үеийн технологийг сонгох хэрэгтэй юм. Сүлжээ нь хил хязгааргүй болохын оронд тэд сүвэрхэг болж, нэвтрэх цэгүүд болон төгсгөлийн цэгүүд урьд өмнө байгаагүй хурдаар үржиж байна. Anti-phishing work group (APWG)-ийн хамгийн сүүлийн тайланд дурдсанаар 2020 оны эхний улиралд бүх фишинг сайтуудын 75% нь SSL ашигласан байна. Тиймээс маш өндөр түвшинд хортой кодыг таних чадвартай технологийг ашиглах хэрэгтэй юм. Энэ нь мэдээж маш их хэмжээний CPU шаардлагатай бөгөөд ийм хэмжээний өндөр гүйцэтгэлийг зөвхөн дараа үеийн галт хана (NGFW) л гаргаж чадах юм.

Хэрвээ танай байгууллага дараа үеийн галт хана (NGFW) сонирхож байгаа бол дараах шалгууруудыг хангасан шийдлийг сонгоорой.

1. Хүчин чадал болон үзүүлэлт

IoT, Cloud гэх мэт зүйлсээс үүдэлтэй өгөгдлийн хэмжээ цаашид ч өсөж, сүлжээний цар хүрээ, цар хүрээ өргөжин тэлсээр байх болно гэдэг бол хөдөлшгүй үнэн юм. Тиймээс аюулгүй байдлын шийдэл нь өгөгдөл, нөөцийн хамгаалалтыг алдагдуулахгүйгээр энэ өсөлтийг идэвхжүүлж байх ёстой. Ихэнх энэ төрлийн шийдлүүд нь тус шаардлагыг хангадаггүй. Иймд энэ төрлийн шийдлийг сонгохдоо үүнийг анхаарч үзэх нь чухал юм.

2. Өргөн хүрээг хамруулдаг байх

Дээр дурдсанчлан онгоцны буудалд нэвтэрч байгаа зорчигчидтой сүлжээний урсгалыг харьцуулах юм бол тухайн зорчигчдын ачааг рентгенээр хянаад, өөр бусад хамгаалалтын системүүдээр оруулах нь маш их хэмжээний цаг авах бөгөөд ингэснээр зорчигчдын цуваа ихэсч түгжрэл үүсэх магадлалтай юм. Тиймээс их хэмжээний өгөгдлийг түргэн шуурхай шалгах чадвартай төхөөрөмжид сонгох нь чухал юм.

3. Автоматжуулалт, гүн хяналт, хиймэл оюун ухаан ашиглах боломжтой байх

Өнөө үеийн халдлагууд сүлжээнд нэвтэрснээс хойш хэдхэн секундийн дотор мэдээлэлд нэвтрэх, өгөгдлийг хулгайлах чадвартай болон хөгжсөн. Тиймээс хортой код эсвэл ямар нэг зөрчил илэрсний дараа маш хурдан хугацаанд хариу өгөх чадвартай шийдэл сонгох нь чухал юм.

Яагаад FortiGate галт хана гэж?

Дэлхийн аюулгүй байдлын шийдэл, төхөөрөмжийн зах зээлд тэргүүлэгч Fortinet компани нь жижиг байгууллагаас эхлээд томоохон enterprise түвшний хэрэгцээ, шаардлагад нийцсэн Firewall төхөөрөмжийг нийлүүлдэг. Firewall төхөөрөмжийн хувьд голлох үзүүлэлт бол бат бөх, эдэлгээ сайтай байхын зэрэгцээ халдлагаас хамгаалах хурд буюу секундэд эсэргүүцэх\хамгаалах халдлагын хэмжээг заасан байдаг. Fortigate төхөөрөмжийн хувьд байгууллагын цар хүрээнээс хамаараад 25mbps-80gbps хүртэлх хүчин чадалтай юм.

Эх Сурвалж: Itzone.mn