Өөртөө итгэлгүй байдлаа титэм мэт зүү! Буюу “сул” талаа давуу талд хувиргасан нь
Би ноомой; сэргэлэн биш; урлаг, спортын авьяасгүй; өөртөө итгэлгүй; хараа муутай; биеийн хүчний ажилд муу; гарын дүйгүй; юманд амархан эмзэглэдэг; хүний арга эвийг олж чаддаггүй бойтогдуу хүн.
Надад гоц гойд ур чадвар, сүрхий өндөр IQ байхгүй; хүний нүдэнд өртөхүйц сайхан царай зүс, бие хаа байхгүй; амин чухал үед тусалж дэмжих, баяр хөөрөө хамтдаа тэмдэглэх олон найз нөхөд байхгүй…
Сурагч, оюутан байхад энэ бүгдээсээ болоод их эмзэглэдэг байв. Зарим нэг сул талыг арилгах гэж зүлгэх тусам улам тодрох нь гачлантай санагдана.
Гэтэл удалгүй энэ “сул” талуудаа давуу талд урвуулан ашиглаж болох юм байна гэдгийг мэдсэн мөчөөс эхлэн миний амьдрал илүү “сайхан” болсон, би илүү “гоё” амьдарч эхэлсэн. Энэ талаараа бичсү.
“Өөртөө итгэлгүй байдал” — миний ташуур
Миний санахын, хүүхэд байхын л би өөртөө итгэлгүй байсан. Хэн нэгэнд загнуулчихгүйг, асуудалд орооцолдчихгүй байхыг л хичээдэг байлаа. “Өөртөө итгэлгүй байдал” гээч нь бараг л миний мөн чанарын илэрхийлэл болчихсон чигээр өнөөдрийг хүргэж байна. Би үүндээ их дургүй байсан юм. Хүмүүстэй айлгүй харилцахыг, бусдаас санаа зоволгүй “сэргэлэнтэх” -ийг, ядаж л таалагдсан охидтойгоо “сээтгэнэх” -ийг хүсдэг байв…
Өмнө нь нуухыг, засахыг оролдож явсан бол одоо би “өөртөө итгэлгүй байдал” -аа титэм мэт зүүдэг болсон. Энэ бол өөрийгөө урагш ахиулах, өөрийгөө оюун санааны болон санхүүгийн эрх чөлөөнд хүргэх хамгийн шилдэг хүч юм байна гэдгийг олж мэдсэн хэрэг.
Өөртөө итгэлгүй байгаа минь намайг билүү шиг хурцалдаг. Би хийж байгаа зүйлдээ шилдэг нь байхгүй л бол байгалийн шалгарлыг давж чадахгүй гэдгийг надад мэдрүүлдэг. Би ур чадвараараа л голоо зогоохгүй бол, мөнгө “хийхгүй” бол бол өөр гарц байхгүй гэдгийг надад үргэлж сануулдаг. Өөртөө итгэлгүй байдлынхаа хүчээр л би хэн нэгнээр ташуурдуулалгүйгээр өөрийгөө чинээнд нь тултал “ажиллуулж” чаддаг…
“Өөртөө итгэлгүй байдал” — миний бамбай
Өөртөө итгэлгүй байдал намайг их олон зүйлээс хамгаалсан. Болж бүтэхгүй нөхөдтэй нийлж хэрэг төвөгт орооцолдохоос, шоу цэнгээнд уруу татагдаж муу зуршилтай болохоос, амьдралын чухал зүйлсээс холдож хөнгөн, гүехэн бүхэнд уруу татагдахаас…
Хамгийн гол нь “өөртөө итгэлгүй байдал” миний амьдралын дуршлыг хамгаалсан. Зүгээр л тэнгэр ширтэхэд, зүгээр л голын урсгалыг хараад суухад, зүгээр л нэг ном бариад хэвтэхэд одоо ч би хамгийн дуртай хэвээр. Амьдралын дуршлаа алдчихсан, үргэлж гял цал бүхнийг хөөж явдаг хүмүүсийн хувьд хамгийн уйтгартай санагдахуйц бүхэн миний хувьд гайхамшигтай санагддаг хэвээр.
Шинэхэн хэвлэгдсэн номын хуудсыг үнэрлээд л, хуруугаараа имрээд суухад ч…
“Өөртөө итгэлгүй байдал” — миний хөлөг
Өөртөө итгэлгүй байдал надад өөрийнхөө дотоод ертөнц рүү өнгийх боломж олгосон.
Сул тал, давуу талуудаа үнэлж цэгнэх; ирээдүйд хийж бүтээх зүйлсээ төсөөлөх; бодож байгаа зүйлсийнхээ талаар бодох; өөрийгөө хөндлөнгөөс ажиглах эрх чөлөөг өгсөн.
Тиймээс “өөртөө итгэлгүй байдал” бол намайг оюун санааны эрх чөлөө рүү хөтлөх бяцхан хөлгөн минь билээ.
Эх Сурвалж: Zolbayar.com